Parlamentario drs. Mervin den un programa radial cu el a dirigi su mes na nos pueblo a trece padilanti cu e gobierno dysfuncional loshi potoshi aki mester bandona Cocolishi. Segun Wyatt-Ras en bes di stimula y inverti den nos pueblo gobierno ta blo keda hinca man den cartera di nos cuidadanonan empobresiendo nos pueblo dia pa dia. Esaki mientras nepotismo ta na ordo di dia den nos pais, den cual tur dia amigo, famia y conocirnan ta keda ser nombra den tur tipo di posicion y fraude den diferente departamento manera na DVG y na Arubahuis ta ser tolera y nada no ta ser haci. E gobierno aki ta haci comosifuera integridad ta nan prioridad y cu hasta a lanta un ministerio special pa garantisa integridad, pero no ta haci nada pa cumpli cu loke a priminti pueblo.
Wyatt-Ras a trece padilanti cu recientemente un cantidad di ciudadano malcontento a acudi na cas di partido di AVP pa mustra nan inquietud, nan maltcontento y nan preocupacion pa e situacion den nos pais. E poder di compra di nos cuidadanonan ta bahando dia pa dia, tin nepotismo, fraude ta na ordo di dia y e gobierno aki tin un asina yama “wanbeleid”.
A entrega un un carta dia 24 di augustus na VNO, firma dor di fraccion di AVP hunto cu e fraccionnan den oposicion MAS y Accion 21 pa gobierno Hulandes por atende cu e “wanbeleid” aki.
CAft recientemente a manda un conseho pa un aanwijzing pa gobierno di Aruba cu a ser trata den Rijksministerraad diabierna ultimo dia 26 di augustus. Evelyn Wever Croes ta haci comosifuera cu esey no ta nada, sinembargo e conseho di CAft ta mustra cu Hulanda a fada di e ganjamente y konkelmento di e gobierno loshi potoshi aki. A start e procedura di un aanwijzing y segun CAft gobierno no a cumpli cu 13 punto cu nan a acorda cu gobierno Hulandes.
Manera cu esnan den gobierno mes a yega di grita den Parlamento si bo pone ken cu ta pa goberna bo ta haya kico cu ta y con cu ta.
Por menciona alabes cu recientemente despues cu durante lunanan tabata papiando di introduccion di BTW dor di e minister di Finanzas awo diripente e minister aki ta bai skonde pa e minister presidente bin anuncia cu enbes di BTW lo hisa BBO cu 1.5 %. Gremionan comercial y sindicatonan (19) a uni y a expresa nan malcontento cu e situacion aki. Aumento di BBO lo tin consecuencianan grandi pa inflacion y lo baha e poder di compra di nos cuidadanonan mas ainda. Dor cu gobierno ta ganja continuamente inversionnan a baha y prijsnan ta keda subi dor cu comerciantenan ta insigur di e situacion economico.
Evelyn Wever-Croes a firma e landspakketten cu Hulanda ganjando Hulanda cu e lo bin Aruba y ehecuta loke el a firma. El a corta 60 miyon den cuido di salud, perhudicando dokternan di cas, dentistanan, specialistanan y otro actornan di cuido dor di cual hopi di nan ta malcontento y hasta tin ta bandonando nos pais.
Den un rapport di HAVA di rencientemente por tuma nota cu tin 6 dokter di cas cu a bandona nos pais y 5 a bai cu pensioen dor di cual tin escasez di dokternan di cas. Dokternan di cas ta bandonando nos pais paso nan no tin e entrada mas cu nan tabatin y dor cu e presion di trabou a subi, en bista cu tin menos dokter pa e cantidad di patient cu tin. E cantidad di pashent pa cada praktijk a subi di 1864 na 2020 pa 2029 na anja 2022. Tambe tin escasez di asistente di dokternan di educacion mas halto. E cortamento di 60 miyon den cuido a afecta e practicanan di dokter masha hopi y lo baha e calidad di cuido.
E critica riba gobierno ta cu no ta ehecuta otro forma di baha gasto den cuido manera cooperacion entre entidadnan, compra di medicina hunto y mas barata y baha e gastonan di tratamento den exterior manera Colombia dor di mihor preparacion di e pashent y contracten.
E gobierno aki kier introduci un eigenbijdrage pero na un forma irresponsable cu lo a trece “klassezorg” cun’e y ora stakeholders a mustra nan preocupacion y fraccion di AVP a vocifera e critica riba e proceder aki a cambia tal decision. Pa loke ta trata e lista positivo cu a introduci na april 2017 a cambia tal decision na augustus 2017 y awor ta menasa atrobe di bai introduci esaki na oktober 2022. Ainda sin bin cu niun sosten di
E ministernan di e gobierno aki no ta skucha pueblo sino ta ehecuta y ora nan wak cu algo ta bai robes ta cambia nan decision. Pues un gobierno loshi potoshi cu no tin direccion, ni ta traha segun metanan y principionan di integridad.
E gobierno aki tampoco no tin fin pa evalua e crisisplan y a haci yen di malpractica cu FASE locual a resulta claramente for di e rapport di ARA cu recientemente a keda trata den reunion publico den Parlamento. Ni papia mes di e contract spoorloos di Eagle LNG cu cual gobierno a firma un contract, comprometiendo nos pais pa 20 anja sin bista riba beneficionan pa nos pais.
Tampoco gobierno no ta inverti den proyectonan bisto. A critica AVP di mega debe pero tur hende por mira unda e placa cu AVP a gasta a bai. A drecha skolnan, a inicia cu renovation y ampliacion di Hospital, a construi green corridor/Watty Vos Boulevard, a construi MFA na diferente bario, a muda waf, a coloca panelnan solar na edificionan di gobierno, skolnan etc. pa genera energia alternativo, a inverti den nos hendenan y pa crea mihor condicion di trabou, a mehora e fondo di pensioen y di SVB, introduci reparatietoeslag pa haci posibel cu esnan cu tin menos cu salario minimo por sobrevivi, a hisa bijstand na diferente ocasion, a introduci un schoolkinderentoeslag pa nos muchanan por cumpra nan material pa skol, a bin cu korting riba pago di studielening, a pasa ley di creche, ley pa proteha nos grandinan y leynan di cuido di salud y di BIG. Tambe a introduci Traimerdia pa yuda mayornan cu ta traha cu cuido di nan yiunan y a introduci e proyecto di sociale vorming pa duna hobennan un SEGUNDA oportunidad, etc.
Contrario na AVP e gobierno aki te ainda no a entama proyecto pa yuda nos hendenan, sino solamente kier hinca man den cartera di nos hendenan pa medio di diferente medidanan, mientras no ta corta den propio gastonan. Por menciona cu den rapport di CAft ta ser menciona cu gastonan di goederen en diensten a aumenta cu 33 miyon florin na 2022 y cu e suma di inhuur van derden of esnan externo pa haci trabounan a crece fuertemente. Ademas huur di edificio tambe a crece cu 40%. Gobierno pues ta keda cumpra auto caro di 150.000, gasta hopi na fiesta y na nombra compinchinan enbes di mira e interes di nos hendenan cu mester. Pesey mas y mas por nota esnan di e mesun signatura di e gobierno actual den coalicion ta uni nan mes cu AVP den e lucha pa sali na interes di esnan cu tin mas mester. A bira tempo pa e gobierno losh potoshi aki bandona Cocolishi rumbo pa cas.
A bira tempo pa AVP haya e oportunidad pa goberna cu e meta di realisa, manera lider di partido Mike Eman a trece padilanti, un bon comun, esta cu interes general mester ta na promer lugar y conhuntamente y solidario cu otro mester logra metanan di interes comun pa nos cuidadanonan.
