Den fin di siman tabatin un tremendo actividad di Grupo di Harley di Shoco Legends dilanti di R.E Yrausquin & Sons hunto cu Old School Bikers Aruba pa Women’s Club of Aruba. Shoco Legends ta keda acerca door di Old School Bikers Aruba y hunto nan a organisa un ride pa asina nan por recauda fondo pa un bon causa. Vice Presidente di Old School Bikers Aruba Oscar Britten ta duna di conoce cu e fundraising ta e comienso di kick off event unda cu a invita tur e bikersnan di Aruba pa participa.
Shoco Legends a keda encarga pa organisa un ride unda cu nan a sali 3 or di atardi y regresa bek 4 or pa asina keda celebra unda cu diferente bandanan tabata toca durante henter e dia. Old School Bikers Aruba conhuntamente cu Shoco Legends a organisa e evento aki y na unda e tabata un exito rotundo.
Un total di 250 bikers a participa y esaki sigur ta un bon comienso pa cu e eventonan cu tin na caminda. Esaki ta un Kick off unda cu a introduci un rifa cu premionan grandi y e fondo di e rifanan aki lo ta pa Women’s Club of Aruba cu nan proyecto di “Dress a Child”. Nos tur sa cu aña pa aña Aruba ta bira mas caro y aña pa aña e lista pa yuda muchanan tambe ta crece, pesey mes tanto y Shoco Legends ta duna un man den e proyecto di Women’s Club of Aruba. E prome premio ta un Harley Davidson, di dos premio ta un scooter electrico y di tres premio ta 3 mil florin cash.
Presidente di Shoco Legends Nielson Halley ta duna di conoce cu Shoco Legends ta existi mas cu 6 aña caba y Shoco Legends semper t’ey pa yuda na momento cu ta trata di un bon causa, unda cu por yuda e bikersnan tey. E rifa ta te cu prome di december pero lo bende rifa te cu29 di november y e sorteo lo ta via DIARIO.
Reina Geerman ta presidente di Women’s Club of Aruba y ta sumamente contento cu tanto Old School Bikers Aruba y Shoco Legends tin e deseo di yuda den e proyecto “Dress a Child “ di Womans Club of Aruba. E proyecto aki ta incera cu Women’s Club of Aruba den luna di december ta bisti mas di 200 mucha menos afortuna durante dianan di fiesta. Women’s Club of Aruba ta acerca diferente comerciantenan diferente miembronan, pero tambe ta organisa diferente actividadnan pa recauda e fondo pa asina logra e meta aki pa e muchanan menos afortuna na Aruba.
Sinembargo mester bisa cu aña pa aña e ta bira un reto y e ta mas dificil pa haya donacion. Sinembargo Women’s Club of Aruba ta hopi hopi contento cu Old School Bikers Aruba y Shoco Legends ta yuda pa por haci e proyecto aki posibel. E rifa ta costa solamente 25 florin y e sosten sigur ta pa un bon causa.
E aña aki Women’s Club of Aruba ta celebra 90 aña di existencia y ta e club di servicio mas bieu di Aruba y aparte di e proyecto “Dress a Child “ tambe e fundacion ta activo henter aña unda cu ta haci diferente proyectonan.
Porehempel den e temporada di juli ta reconoce e miho graduadonan di tur e scolnan secundario rond di Aruba, tambe ta pasa na cas di e grandi nan unda cu ta hunga bingo cu nan, tambe ta celebra dia di mama, dia di tata, carnaval, ta dedica den luna di october riba adulto mayor y den luna di december tambe tin Chrismas Dinner . Women’s Club of Aruba ta aprecia cada florin cu comunidad ta haci donacion pa asina e fundacion por sigui traha pa comunidad di Aruba.
