E siman aki e trabounan pa haci bisindario di Parke Plasa Chiku Goeloe cu ta bon frecuenta, mas atractivo y sigur, a cuminsa. Lo haci diferente adaptacion riba tereno di infrastructura y landscaping.
Kapa duru: Ta bay duna e luganan di parkeer y e area rondo di e parke un capa duro y ta pone un acera eleva, caminda ta tene cuenta cu personanan cu un desabilidad. Ta kita tur waya riba tera y pasa nan bou di tera. Ta bin luznan di caya nobo di LED cu ta eficiente den uzo di coriente y ta contribui na haci e bisindario mas sigur. Ademas ta spaar asina riba gastonan di maneho y mantencion. Banda di esey ta pone un sistema di drenahe pa garantisa cu tin suficiente desagwe.
Ambiente berde: Un ambiente berde tin hopi bentaha. Pa e motibo ei diputado Hennyson Thielman ta haña importante y ta enfoca pa tene cuenta cu esaki den proyectonan. E tin efecto positivo riba salu di hende, e ta contribui na calidad di bida di e bisindario, ta drecha medio ambiente, ta elimina polucion y ta percura pa extra frescura durante periodonan di calor extremo.
Plasa Chiku Goeloe: Ta haci uzo di e parke Plasa Chiku Goeloe pa diferente actividad di hoben y adulto. Tur aña ta tene celebracion di Dia di Antriol na e sitio aki. Tambe ta duna semanalmente les di karate eynan, tin aparatonan di fitness cu tur hende por haci uzo di nan y tin un sala disponibel pa encuentronan oficial y festivo.
A traves di nos pagina di facebook y comunicado di prensa lo tene bo na altura di tur trabou di caretera y di proyectonan.
