Algun dia pasá, nos tabatin tres kaso di infekshon ku e vírùs di corona. Pero esei a subi awor yega 18 hende infektá.
E vírùs ta presente na Boneiru, esei ta sigur. Tur e último infekshonnan ta tuma lugá bou di habitantenan di Boneiru. Pa sa kuantu hende ta infektá, ta nesesario pa hopi hende laga tèst nan mes. Último tempu nos a mira ku ménos hende ta laga tèst nan mes.
Ta keda importante ku bo ta laga tèst bo mes mesora ora bo tin fèrkout, kentura, doló di garganta, tambe ora e kehonan ta leve òf a kaba kuminsá. Si bo no laga tèst bo mes, miéntras podisé bo tin corona, bo por infekta otro hende. E ora ei hopi hende tin ku bai den karentena, sigur si bo no a tene bo mes na e medidanan di distansia i higiena. I si nos sigui haña mas i mas kaso di COVID-19, mester adaptá e medidanan.
Nos a eksperensiá awor algun biaha, ku tòg tin hende ku ta bishitá nos isla, ta infektá. Miéntras nan tabatin un resultado di tèst negativo di PCR. Manera boso sa, e tèst di PCR i e tèst antígeno no ta duna 100% di siguransa ku un hende no ta infektá. E chèns ta grandi ku bishitantenan a bini ku e vírùs ingles òf un otro forma di e vírùs kambiá. Nos ta investigando esei awor.
Si bo ta haña bishita di pafó di Boneiru, tene kuenta ku podisé tòg nan ta infektá. Aunke nan tabatin un resultado di tèst negativo. Tene distansia. Tambe di bo bishitantenan. No brasa nan ora nan yega. E mihó kos ta pa bo yama bo bishitantenan bonbiní riba distansia. Splika bo bishitantenan ku nan ta bonbiní. I ku nan tin ku tene kuenta ku podisé tòg nan tin e virùs. P’esei ta keda konsehabel pa tene distansia i evitá grupo grandi di hende. Pa seguridat di e bishitantenan i seguridat di habitantenan di Boneiru.
For di otro siman, por bakuná kontra corona. Miéntras nos tur no a bakuná, ta keda importante pa tene nos mes na reglanan di corona. Solamente asina nos ta tene e kantidat di infekshon abou i protehá esnan ku un salú vulnerabel. E vírùs no ta move, ta hende ta plama e vírùs. Nos mester di otro pa prevení esei.
