Tourism Corporation Bonaire (TCB) ta anunsiá ku a
selektá dos studiante, Tharia Phelipa i Barbara Boezem, komo e resipientenan di mas
resien ku a risibí e Bonaire Tourism Scholarship Program pa e aña akadémiko 2024-2025.
E bekanan akí lo sostené nan formashon i nan futuro kontribushon na Boneiru su sektor
turístiko.
Tharia Phelipa, nasé i lantá na Boneiru, ta bai sigui un estudio na nivel di master den
Turismo, Kultura i Komunidat na Erasmus Universiteit Rotterdam. Tharia tin un diploma
di bachelor den antropologia kultural i ta pashoná pa laga konservashon di kultura kana
man den man ku desaroyo di turismo sostenibel. El a ekspresá su kompromiso ku su isla
di e siguiente manera: “Mi meta ta pa kontribuí na desaroyo sostenibel di Boneiru pa
medio di turismo, i pèrkurá ku esaki ta na benefisio di nos komunidat i ku na mes
momentu nos medio ambiente úniko i nos patrimonio kultural ta keda konservá.”
Barbara Boezem, ku aktualmente ta siguiendo e formashon pa Mènedjer den Turismo i
Hospitalidat na MBO Boneiru, tin un pashon fuerte pa merkadeo i medionan sosial den
sektor turístiko. Barbara su intenshon ta pa hasi uso di su beka pa sigui studia i desaroyá
su abilidat den kreamentu di kontenido, kaminda su soño ta pa promové Boneiru riba un
eskala mas grandi. “Mi a lanta na Boneiru i mi a keda sumergí den diferente kultura, loke
a forma mi pashon pa beyesa, medionan di komunikashon i biahamentu. Eksplorá
paisnan nobo i brasa e diferente kulturanan ta emoshoná mi i ta alimentá mi soño pa
manehá un empresa turístiko,” asina Barbara a kompartí.
TCB i Guardian Group Fatum ta felisitá Tharia i Barbara ku nan determinashon i vishon.
Nan dedikashon na nan estudio i nan kompromiso ku nan komunidat ta reflehá e balornan
di e Bonaire Tourism Scholarship Program, di manera ku den futuro nan lo ta lider den
sektor di turismo i ‘role model’ pa otro studiantenan na Boneiru.
E Bonaire Tourism Scholarship Program ta sigui hunga un ròl importante den dunamentu
di forma na e futuro turístiko di nos isla pa medio di tesorá talento lokal, promové
kresementu profeshonal i duna sosten na desaroyo di un forsa laboral bon kapasitá ku lo
yuda e sektor bai dilanti.
