Dos studiante mas ta risibí nan Bonaire Tourism Scholarship Award

Tourism Corporation Bonaire (TCB) ta kontentu di por anunsiá ku a selektá dos kandidato ekselente, Rober Wester i Miguel Yglesias, komo e studiantenan di mas resien ku ta benefisiá di e Bonaire Tourism Scholarship Program. Pa medio di hasi posibel pa kandidatonan talentoso manera Rober i Miguel mehorá nan abilidatnan i konosementu, e programa di beka tin komo meta pa fortifiká e sektor turístiko lokal i krea un forsa laboral floresiente. 

Rober Wester, un di e personanan meritorio ku a optené e beka, ta bai sigui un formashon di ‘bachelor’ pa su Sertifikado Pedagógiko (Pedagogisch Getuigschrift). Tokante su pashon pa turismo e ta bisa: ‘Turismo ta trese hende huntu, turismo ta konektá hende ku diferente bèkgrount ku otro i ta krea unidat ku ta krusa frontera. Ku mi ‘bachelor’ den Hospitalidat i Maneho di Turismo i mi Sertifikado Pedagógiko nobo mi por bai duna lès na MBO Boneiru, na e formashon di Hóreka i Turismo. Mi aspirashon ta pa kompartí mi eksperensia i konosementu ku e generashon nobo di profeshonalnan den turismo. Mi ke sòru ku nos propio hendenan ta bai apresiá e sektor atrobe, kuminsando ku nos hóbennan.’

Miguel Yglesias, e otro studiante eksitoso ku a risibí un beka, a dediká su mes na diferente ròl den sektor di hóreka i ku pashon el a profundisá su mes den arte kulinario. E ta bai kontinuá su formashon komo shèfkòk na MBO Boneiru. Tokante su motivashon Miguel ta bisa lo siguiente: ‘Mi vishon ta pa huntu ku mi kasá habri un restorant ku ta kombiná estilonan lokal i internashonal. E beka akí ta un tremendo oportunidat pa profundisá mi konosementu di arte kulinario mas aleu i pa mehorá mi abilidatnan komo profeshonal, loke por influensiá Boneiru su esena gastronómiko positivamente.’

TCB i Guardian Group Fatum ta aploudí e dedikashon i determinashon di Rober i Miguel. Nan kompromiso buskando ekselensia den sektor turístiko ta konektá perfektamente ku e mishon di e programa di beka pa promové kresementu i prosperidat dentro di e sektor turístiko bibito di Boneiru. Nan ta sirbi komo inspirashon pa tur hende ku ta aspirá un posishon riba tereno di Hospitalidat i Maneho di Turismo.

E Bonaire Tourism Scholarship Program ta keda un forsa sentral den dunamentu di forma na futuro di e sektor turístiko di nos isla, pa medio di tesorá talento, enkurashá desaroyo profeshonal i kultivá forsa laboral lokal kapasitá.

Lesa mas tokante e programa akí riba www.bonairescholarship.com