Ayera na Aeropuerto internacional Reina Beatrix, Aduana a para dos pasahero pa control. Nan tabata bolbiendo Aruba desde Colombia. E pasaheronan, un homber y un muher, a keda sin meld na Aduana cu nan tabatin mas di 24.000 Dollar cu nan. E placa tabata scondi den un zapato y un maleta. E personanan a wordo entrega na Polis. E placa a wordo tuma den beslag.
Tur beslag lo wordo hinca den e Fondo di Combati Criminalidad (Criminaliteitsbestrijdingsfonds). Placa di e fondo aki ta wordo usa pa bringa criminalidad y ta cay directamente na bienestar di Aruba. Di e manera aki Afpakteam ta aporta na e fondo.
Afpakteam ta den cooperacion cu Ministerio Publico, Cuerpo Policial di Aruba, Aduana, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst, Marechaussee (KMar), Kustwacht di Aruba, Meldpunt (Ongebruikelijke Transacties) y RST. Por acerca Afpakteam cu informacion tocante señalnan di labamento di placa via mail: afpakteam@kparuba.com of via tiplijn: 11141.
