Dos homber inmigrante deteni pa atraco den Punda

Diasabra 2 di september 2023 alrededor di 12.08’or, Central di Polis a ricibi informacion di un atraco cu tabata tumando luga den un joyeria den Breedestraat Punda.

Mesora a dirigi unidad di Punda na e sitio.Na su yegada el a bin topa un homber drumi abou riba caya cu herida na su cara, mientras cu tabatin un scooter tambe benta abou mei-mei di caminda.

For di investigacion cu polis a haci na e sitio a sali na cla cu algun rato prome un homber a drenta e joyeria y bou di menasa a destrui e vitrinanan y bay cu prenda cu tabatin den nan. Parti pafo di e establecimento, tabatin un otro homber riba un scooter tabata warda e atracado.

Na momento cu ya nan tabata cla pa huy, un ciudadano a frustra e huida dor di ranca e sospechoso sinta patras for di e scooter, cu e consecuencia cu ambos a perde balansa y cay hunto cu e botin cu nan tabatin den nan poder.

Personanan den bisindario a rondona e sospechoso cu tabata sinta patras y a impedi cu e por a core bay. E unidad cu entre tanto a yega, a haci detencion di e homber sospechoso D.A.M.C di 33 aña di edad nace na Colombia. Debi na e slanan cu el a ricibi entre otro na su cara, el a keda transporta cu ambulance pa C.M.C. pa tratamento medico.

E otro homber sospechoso W.F.A.S. di 53 aña di edad nace na Republica Dominicana a trata di huy na pia, pero no mucho rato despues a keda deteni den Hanch’i Snoa y hiba warda di recherche.

E botin a keda entrega na propietario di e negoshi mientras cu a confisca e scooter. Ambos sospechoso a keda presenta dilanti di un fiscal auxilia ku a ordena nan encarcelamento pendiente di mas investigacion.