E dos frizernan pa almasenamentu di e bakuna kontra corona ta yega Boneiru djaluna 25 di yanüari. Esaki Joey van Slobbe di departamento di Salubridat Públiko a duna di konosé. Van Slobbe ta responsabel pa e preparashonnan pa bakunashon na nos isla. Djaweps 28 di yanüari un tim di RIVM ta yega Boneiru. E miembronan di e tim akí ta kontrolá si tur kos ta bon reglá pa meimei di luna di febrüari kuminsá ku e bakunashon.
,,Un di e frizernan ta pa almasenamentu di e bakuna PfizerBioNTech. Mester warda e bakuna akí na -70 grado. E otro frizer ta adekuá pa almasenamentu di e bakuna Moderna, mester warda esaki na -20 grado”, asina Van Slobbe a deklará.
,,Pa e promé fase di bakunashon Boneiru ta haña e bakuna PfizerBioNTech. Nos no sa ainda si Boneiru ta haña e bakuna Moderna òf e bakuna AstraZeneca ku ainda mester haña aprobashon. Supongamos ku tòg nos haña e bakuna Moderna, e ora ei ya kaba nos tin e frizer. Di e manera ei nos ta bon prepará pa tur posibilidat.”
E bakunashon ta bai den fase na Boneiru. ,,Den e promé fase ta bakuná hende di 70 aña bai ariba i personal den kuido. Despues di esei hende di 60 te ku 70 aña ta na bùrt i hende ku ta den un grupo di riesgo. Por ehèmpel hende ku tin un malesa kardio vaskular, malesa di pulmon òf malesa di suku. Despues ta bakuná hende salú for di 18 aña te 60 aña.’
