Ministerio di GMN recientemente a organisa un encuentro cu tur “dive operators” di Corsou pa sigui elabora y ricibi instruccion concreto con pa atende cu e mas recien malesa di coralnan den Caribe, Stony Coral Tissue Loss Disease.
Ministerio di GMN a bini ta informa comunidad caba di e malesa aki y a publica momento cu Minister Pisas a bay sambuya pa e mes tuma nota di e situacion di atencion aki riba cual Minister a tuma accion tambe. Durante e encuentro aki dr. Mark Vermeij un bes mas a mustra “dive operators” den detaye con mester aplica e remedi pa combati e malesa aki y tambe con distingui e malesa nobo for di otro malesanan.
Tabatin 10 “dive operator” presente i na final di e encuentro nan a registra pa ricibi e remedi Antibioticum amoxicilline y un spuit cual nan lo bay uza momentonan cu nan bay sambuya. E remedi ta consisti di un puiru y un pasta Base 2b cu mester wordo mescla. Mester yena e mescla aki den un spuit i bou di awa mester spuit e remedi riba partinan afecta di e coral y hunta esaki cu dede alrededor di e parti afecta. No ta un tarea fásil, pero “dive operators” ta kolaborá ku esaki pasobra coralnan sano ta di sumo importancia pa nan industria.
Ta bay organisa un encuentro cu un ultimo grupo mas di “dive operators” y asina por conclui cu tur a ricibi e remedi. Coralnan cu tin e malesa aki por mira esaki na e manchanan blanco cu ta aparece riba e coral. Minister Pisas a tuma nota di e consecuencianan cu e malesa aki por tin pa Corsou y a tuma accion rapido. Coralnan sano ta importante pa nos industria di buceo, pero tambe di sumo importancia pa existencia di un cantidad di piscanan cu nos ta consumi. Ministerio di GMN lo sigui informa comunidad di e accionnan cu ta tumando pa atende cu e problematica aki.
