Aktualmente Direktorado di Supervishon i Mantenshon di Lei ta okupando su mes
aktivamente ku mantenshon di lei na Boneiru. Durante kontròlnan regular inspektornan di
Direktorado di Supervishon i Mantenshon di Lei ta topa ku diferente iregularidat i vários
infrakshon. Pa e motibu akí nos ke hala atenshon di tur hende riba e legislashon i regulashon
vigente, manera entre otro Plan di Desaroyo Teritorial Boneiru, Lei di Bibienda Popular,
Ordenamentu Teritorial i Maneho di Medio ambiente BES, i Dekreto di Establesimentu i Aktividat
ku ta aplikabel pa tur hende.
Nos ke hala atenshon di tur persona privá i empresario riba lo siguiente:
1. Konforme bo pèrmit (di konstrukshon) bo ta obligá pa bo tin e pinturanan korekto di
konstrukshon i e pèrmitnan korekto na bo ubikashon (di konstrukshon). Si bo no kumpli ku
esaki, bo ta kore riesgo di haña un instrukshon pa para e konstrukshon. Un instrukshon pa
para konstrukshon ta enserá ku na momentu di risibí e instrukshon pa para ku e
konstrukshon, bo tin ku stòp inmediatamente ku bo trabounan.
2. Dependiente di e situashon, despues di un instrukshon pa para konstrukshon por kuminsá
ku un trayekto di mantenshon di lei, den kaso ku por ehèmpel bo no tin un pèrmit (di
konstrukshon) pa loke bo ta konstruyendo i/òf ke bai konstruí.
3. Na momentu ku bo ke kuminsá ku un empresa, konforme lei bo mester ta den poseshon di
un pèrmit di establesimentu, promé ku bo tin mag di establesé un empresa na Boneiru.
4. Bo mester ta den poseshon di e pèrmitnan korekto, dependiente di bo tipo di operashon
empresarial.
5. Den kaso ku bo no ta den poseshon di e pèrmitnan korekto pa bo operashon empresarial,
bo ta kore riesgo ku por sera bo ubikashon empresarial inmediatamente.
6. Bo ta hasiendo uso di tereno di gobièrnu sin ku bo tin pèrmit di Entidat Públiko Boneiru i
sin ku bo a paga prekario (tarifa di usuario) pa esaki? Pensa por ehèmpel riba bòrchi di
propaganda, mesa i stul, baki pa mata i baki di shushi. E ora ei kordialmente, pero
insistentemente nos ta supliká bo pa mas rápido posibel hasi petishon pa optené derecho
di prekario pa e ophetonan ku bo a pone riba tereno di gobièrnu. Sin pèrmiso bo ta kore
riesgo di konfrontá medida di mantenshon di lei.
Bo por evitá retraso i medida di mantenshon di lei, pa medio di regla tur dokumentu nesesario na
tempu. Nos ta pidi personanan privá i empresarionan pa for di awor pone nan asuntunan na òrdu i
kumpli ku e legislashon i regulashon vigente.