Riba proposishon di Bonaire Holding Maatschappij NV (BHM), akshonista di Bonaire
Laboratorium NV (BonLab), entrante 16 di yanüari 2023 señora Anneke Visser a haña nombrashon komo direktor statutario temporal.
E nombrashon ta relashoná ku e reorientashon riba futuro di BonLab. No opstante e echo ku Kuido i Hubentut Hulanda Karibense (Zorg en Jeugd Caribisch Nederland – ZJCN) a anunsiá ku entrante 1 di yüli 2023 nan ke terminá e kontrato di kuido i ku e konsulta ku ministerio di Salubridat, Bienestar i Deporte te na e momentu akí no a kondusí na un rekonsiderashon di e punto di bista ei, Kolegio Ehekutivo, den liña
ku deseo di Konseho Insular, ta konsiderá kontinuashon di servisio di BonLab komo interes sosial. Esaki ta e motibu pakiko Bonaire Holding Maatschappij NV den su ròl komo akshonista di BonLab huntu ku e Hunta di Komisario ku ta asumiendo funshon ta konsiderá un reorientashon nesesario, kaminda ta eksplorá diferente senario ku tur tin komo ophetivo pa den un forma duradero mantené e tareanan di e
organisashon.
Despues di un prosedura públiko di selekshon di parti di un ofisina di reklutamentu, Bonaire Holding Maatschappij despues di konsulta ku su akshonista Entidat Públiko Boneiru a hasi un proposishon definitivo. Nombrashon di señora Visser ta konta pa un aña. E lo sigui desaroyá e strategia ku ta sigurá kontinuidat di e servisio i tambe aksesibilidat di esaki i alabes prepará e organisashon pa esaki.
Bonaire Holding Maatschappij NV ta haña importante pa na nòmber di otronan enbolbí, ekspresá su gratitut pa e manera ku direktor interino Hosé Booi a traha duru pa guia BonLab atraves di un temporada yen di insiguridat. Un resultado importante den e periodo difísil akí ta optenementu di dos akreditashon di BonLab, ku kua BonLab por garantisá kalidat di e servisionan ku e ta duna. Durante e dos lunanan
binidero señor Booi lo dediká su mes na un traspaso responsabel na señora Visser.
Te na fin di aña 2022 señora Anneke Visser tabata sekretario di gerensia di WEB. Den e funshon akí e tabata estrechamente enbolbí ku desaroyo di strategia i inisio di implementashon di strategia di e kompania di energia.
Drpd: Señora Adely Susana Jansen (Direktor Statutario di BHM), señora Anneke Visser (Direktor Statutario nobo di BonLab), señor Hosé Booi (anterior Direktor Statutario di BonLab)
