Miembronan a duna sosten total na Elsa Rozendal pa bira e lider polítiko di e tolda kora. Den un ambiente di euforia e ‘Krachinan’ a ekspresá nan konfiansa den e dama ku por sierto a sigui su tata, esta Boy Rozendal q.e.p.d.
Den su promé palabranan Elsa Rozendal a hasi un apelashon na tur ‘Krachi’ pa bini kas bek i gara e antorcha di Partido Democraat rumbo pa viktoria dia 19 di mart próksimo.
E lider polítiko nobo despues di a risibí aplouso grandi di tur esnan presente a gradisí pa e honor di por para na kabes di un partido di asina tantu trayektoria. Un partido kaminda su tata i tionan tambe a militá. Elsa Rozendal a mustra ku e komunidat aki ta den un estado di sobrebibensia. ‘Nos mester para ketu, reflehá i kòrda esei pa por sigui desaroyá i progresá. Ta hustamente den temporadanan manera esun di awor aki ku ignoransia i mal maneho ta ménos aseptabel ku nunka. Kada miembro di e sosiedat aki meresé un moda di biba ku ta brinda muchu mas seguridat positivo.
Miedu ta algu ku ta dominá den komunidat, sea ta miedu pa Covid-19, miedu di pobresa òf desempleo i otro aspektonan ku ta krea miedu. Pa e mayoria den e pais aki futuro ta unu insigur i sin muchu perspektiva. Elsa Rozendal a lanta dilanti di e pueblo aki yen di optimismo i kreatividat, ku un mente habrí pa komprondé nesesidatnan di e pueblo aki. Elsa tei pa skucha i saliendo for di su karakter propio mesora e ta en buska di solushon. Su meta ta pa enfrentá i atendé ku retonan ku ta afektá e komunidat den su totalidat, sin laga niun hende afó.
‘Tur loke mi a hasi, ta hasi i lo hasi mi ta mantené mi mes na un promesa i prinsipio propio, esta sirbi mi pais ku humildat, rèspèt i sabiduria. Eksperensia a siña mi ku solushon i tambe posibilidatnan por ta na e skina mas inesperá.
Pueblo di Kòrsou a mira kon vários di su pilanan ekonómiko fundamental a keda gravemente afektá i kasi a disparsé. Danki na nos base i fundeshi, speransa ta bria den tur su gloria. Ami Elsa Rozendal ta rekonosé e potensial di nos pueblo ku sertitut”.
Di e forma ei e lider polítiko di Partido Democraat a habri su brasanan pa risibí tur ‘Krachinan’ i tur otro hende den nos komunidat pa nan tur por sinti e konfiansa i trankilidat ku un partido manera Partido Democraat di un trayektoria asina largu semper a trese pa e komunidat aki.
