Awe mainta na Welcome Plaza a tuma luga un protesta cu a sigui pa parlamento y sede di gobierno.
E artesanonan a dicidi di bin dilanti pa asina nan mustra nan mal contento unda cu nan tin practicamente 1 aña ta warda riba un contesta di DIP riba e maneho di Welcome Plaza.
Lidia Maldonado ta un artesano Arubiano y su persona tambe tin un kiosko na Welcome Plaza cu ta sera desde maart. E grupo di artesanonan a manda un carta na DIP pa asina bin cu un solucion , pero cu te awe no a haya ningun contesta. Loke ta un realidad ta cu for di maart cu mundo a keda afecta door di COVID -19 y Aruba tambe tur e kioskonan di Welcome Plaza a sera su portanan.
Di e manera aki e artesanonan a cuminsa biba di e incertidumbre cu tin . Aruba ta un pais cu ta depende hopi di turismo y na unda cu e kioskonan ta situa no tin turistanan ta yegando debi cu no tin crucero y esey ta significa cu no tin entrada. E artesandonan di Welcome Plaza no ta depende di ningun otro trabao cu ta nan trabao como artesano. Na momento cu porta a sera e prome preocupacion ta con lo sigui y con lo haci cu e pan di cada dia.
Den e pensamentonan aki a bin padilanti cu lo acerca DIP pa pidi un solucion pa haya kwijtschelding y tambe yega na un areglo pa loke ta trata e huur di e kioskonan. Sinembargo e tema pa e huur di e kioskonan no ta nada pa DIP mirando cu prome cu e pandemia tabata papia caba pa yega na un miho areglo debi cu e huur ta mucho halto.
Sinembargo nunca no a haya un contesta , a yega di manda carta , manda mail, ta yama , pero no ta haya ningun contesta for di e director di DIP. Na augustus na momento cu a haci un conferencia di prensa a ricibi un yamada di DIP y tabata contento cu porfin lo haya un reunion cu DIP unda cu lo sinta cu e personanan conserni cu ta director di DIP y funcionarionan cu e propetarionan di Kioskonan riba Welcome Plaza por sinta y splica e situacion cu nan ta den dje.
Sinembargo e reunion a bay hopi bon y despues di algun reunion a keda informa cu mester manda carta na minister di infrastructura y minister di financien cu ta encarga cu Welcome Plaza unda cu tin e contract firma. Tur e cartanan aki a keda manda pero lamentablemente nada despues di entrega di e cartanan aki no a cambia y no a haya ningun contesta. Den e ultimo reunionnan cu tur e artesanonan a dicidi acerca e minister conserni di infrastructura , pero e cartera di infrastructura a conoce dos ex minister mas cu ta ex minister Otmar Oduber y Ex minister Marisol Lopez Tromp cu ningun di dos no a trece un solucion pa e situacion na Welcome Plaza.
E situacion na welcome plaza no ta sano mas y e artesanonan ta urgi pa sinta papia cu un persona cu por tuma un decision na bienestar di tur artesano na welcome plaza. Awe ta haci practicamente 11 luna y 2 siman ta wardando riba un contesta di DIP. Via di e assosacion a trata di haya un reunion cu prome minister cu tambe awo ta encarga cu e cartera di DIP pa asina wak si por haya un meeting cu ne pa asina splica prome minister Evelyn Wever croes tur e situacion pa asina e por compronde y por actua .
Lo haci entrega di tur carta y emailnan cu ta mustra cu a trata di yega na director di DIP pa por yega na un solucion. SInembargo e artesanonan ta compronde di tur loke e pais ta pasando aden cu tur su dificultadnan y e retonan cu tin , pero tambe ta pidi pa mira e situacion di tur e artesanonan di welcome plaza ta pasando aden cu no sa kico ta bay pasa cu nan pan di cada dia mayan cu tur e situacion di COVID -19 pasa. E grupo di artesanonan ta pidi prome minister pa duna oido na e situacion aki.
E grupo preocupa a marcha di welcome plaza pa bestuurskantoor pa haci entrega na un carta na prome minister pa por reuni cu prome minister riba e situacion aki. Ta lamenta cu director di DIP cu tabata forma parti di e maneho di tanto Ex minister Otmar Oduber y Ex Minister Marisol lopez Tromp no a atende y trata e situacion di Welcome plaza y esaki ta mustra di un falta di respet pa tur comerciante.
