Sumamente lamentabel, condenabel y hasta infantil: Esaki tabata nos prome pensamento despues cu nos a lesa e comunicado di prensa di Movemento 21 (M21) caminda diputado Thielman ta wordo ataca – no riba su maneho, sino personalmente – y hasta ta sugeri cu e lo mester renuncia.
Den e caso aki ta hopi importante pa haci algun pregunta critico. Na prome luga, mester puntra si ta na su luga pa atende personalmente cu diputado Thielman pa cu e negoshi “Hype Event Planner” cu ta riba nomber di su casa. Ademas, mester puntra si e negoshi mester di un permit di construccion si of no. E permit pa construccion a keda pidi pero esaki a keda rechasa. E rechaso ta basa riba cierto interpretacion di lei y regla cu un tent no por keda para un caminda pa mas largo cu un periodo. Si e periodo indica pasa mester bolbe pidi un permit. Pa evita cu cada bes mester renoba e permit a pidi un permit di construccion. Pero, basa riba cu loke tin eynan ta keda categorisa como un tent, e permit di construccion a keda nenga y cu rason. E permit di evenemento por cierto ta keda valido y ta cubri tur e actividadnan, esey ta nifica cu no por papia di ningun ilegalidad den henter e asunto aki.
Articulo 41b di e lei di Munisipio (Gemeentewet) y articulo 48 di WolBES ta establece cu un diputado di un Munisipio y un diputado na Boneiro no por desempeñá cualke funcion secundario cu por perhudica cumplimento adecua di e funcion di diputado. Articulo 48 inciso 2 ta prescribi cu un diputado mester meld su intencion pa un funcion secundario na Conseho Insular. Te asina leu no tin indicacion cu diputado Thielman tin un funcion secundario cu ta indeseabel. Si esaki ta e caso anto Conseho Insular tin tur derecho pa atende cu diputado Thielman riba esaki.
Articulo 49 di WolBES sinembargo ta prescribi cu un diputado mester declara por escrito na e representante di Reino, exactamente tur interes comercial y bienes cu e y su casa tin of ta administra. Segun articulo 51 di Bolbe e representante di Reino tin e deber di tene tur cos secreto y solamente por duna informacion of declaracion na e instancianan cu ta encarga cu investigacion penal. No ta pornada cu e declaracion menciona ta bay pa e representante di Reino y mester keda secreto, pues esaki ta netamente pa proteha un diputado contra atakenan baho y sushi manera ta e caso awor.
Un diputado ta permiti tin un interes comercial y ta normal cu e interesnan ta keda pone na un distancia, di forma cu e maneho di e negoshi of e interes no ta den man di e diputado. Cu un interes comercial of un negoshi, ta bini acerca asuntonan di pidimento di permiso y obligacionnan di pagonan di impuesto etcetera. Ta hopi infantil pa culpa e diputado den e cuadro aki di un comportacion no etico y cu e la eherce influencia.
Manera e codigo di conducta ta prescribi, diputado Thielman tabata dispuesto pa contesta e preguntanan den Conseho Insular tocante e interes comercial, caminda atrobe mester enfatisa cu e no ta involucra den e operacion diario di e negoshi. Pues debidamente e la demostra di ta habri y transparente, locual ta permiti Conseho Insular di tin un bista optimal y por husga e actuacion di e diputado y e rasonamento tras di esaki.
E lider politico di M21 cu ta Sra. Coffy tur dia tin su boca yen cu nos mes hendenan mester haya oportunidad pa ocupa puestonan halto den nos comunidad. Durante e celebracion di Dia di Boneiro e la expresa masha bunita palabra cu mester crea un ambiente caminda diferente cultura por florece y mester tin respet pa otro. Probablemente e tabata tin e comunicado venenoso ya prepara caba pa publica esaki, pues tur su bunita palabranan tabata un frase. Segun diccionario esun cu ta fini otro di loke e realmente ta, ta keda categorisa como un hipocrita.
Nos no por spera otro di un bulado di cura, cu e ta blaas e asunto for di tur proporcion. Ta haci manera e diputado a actua na un manera no integro, tur esten cu a keda comproba cu e diputado no a ni tuma ningun accion ni tabata tin influencia den e asunto aki. Lamentablemente e interes general di e pueblo di Boneiro si ta keda afecta profundamente, pasobra candidatonan potencial pa bira diputado of miembro di conseho insular lo bay pensa dos tres biaha pa scoge pa esaki. Mirando cu un set di aventurero politico ta daña nan nomber y di nan famia y ta purba di destabilisa e comunidad Boneriano. Hopi tristo.
