Directiva di Camara di Comercio y Industria (KvK) a tene un reunion cu Aruba Tourism Authority (ATA) riba diahuebs, 21 di januari ultimo, pa delibera tocante e desaroyo mas recien den turismo, e strategia di marketing y e pronostico pa aña 2021.
KvK y ATA a repasa aña 2020 y a discuti e velocidad di un recuperacion di nos turismo pa e aña aki. Manera a wordo proyecta door di World Tourism Organization (UNWTO), e turismo mundial a baha cu 70% den comparacion cu 2019. Na Aruba e recuperacion di nos turismo ta un poco mas positivo. For di e resultadonan di 2020 por constata cu Aruba a logra di recupera cu 33% di e total di bishitantenan compara cu 2019.
Pa aña 2021 ATA a pronostica un recuperacion entre 45% y 60% den comparacion cu e cantidad di bishitantenan na aña 2019, pero tur cos ta depende di e situacion mundial, cu ta cambia continuamente. ATA a indica di a revisa e strategia di marketing, mirando e intensidad di e pandemia na diferente continente. Pa aña 2021 ta premira cu Merca lo bay keda e contribuyente di mas grandi, hasta cu un share den mercadeo mas grandi cu anteriormente (actualmente 80%). Tin hopi restriccion pa vuelonan for di Europa y Latino America. Lo mester keda monitorea e situacion di cerca ya cu na cualkier momento por bin cambio. Asina e “Centers for Disease Control and Prevention” di Merca (CDC) a anuncia recientemente algun medida adicional cu por descurasha e cuidadanonan aun mas pa biaha, ya cu e.o. ta exigi un resultado negativo prome cu nan por biaha bek pa nan pais y pa cierto caso lo por hasta aplica cuarentena obligatorio.
KvK y ATA a palabra cu e aña aki nan lo bay traha hunto cu e meta pa aparte di promove Aruba como destinacion turistico di un manera mas optimal pa brinda nos bishitantenan un “Aruba Experience” sublime, lo enfoca tambe riba guia y sosten na nos comunidad empresarial.
