Djaluna último diputado Hennyson Thielman di Desaroyo Ekonómiko i Turismo a tene un diskurso durante e Kumbre di Turismo Boneiru di Tourism Corporation Bonaire (TCB). Durante e enkuentro desaroyo turístiko i e vishon pa Boneiru pa e añanan binidero tabata sentral.
Thielman a pone énfasis riba importansia di kolaborashon pa realisá e vishon di nos isla, manera ku a formulá esaki den e Plan Maestro Stratégiko Turístiko. Den esaki inklushon di nos komunidat lokal ta un prioridat.
‘Tin vários kòmbersashon ta tumando lugá ku sektor di hospitalidat, ku komo meta pa for di 1 di yanüari 2023 hisa e salarionan den e sektor akí te na por lo ménos 1300 dòler pa luna. E sektor turístiko mester bira un ehèmpel ku otronan por sigui na nos isla. Turistanan ta bini pa e outentisidat di nos isla. Pa medio di tuma hende lokal den servisio, nos no ta alsa solamente kalidat di bida di habitantenan di Boneiru, pero nos bishitantenan tambe ta haña un eksperensia outéntiko’, segun e diputado.
El a agregá na esaki: ‘Un kara fiho i ora rekonosé nan na momentu ku nan regresá nos isla un biaha mas, ta hasi hopi den eksperensia di e turista. Desaroyonan den turismo mester bai reakshoná rápido i fásil riba e turista ku ta kualitativamente di balor haltu, ku ta bini pa nos naturalesa, pa nos kultura i pa nos hendenan i ku ta dispuesto pa gasta sèn na esaki, di manera ku bienestar di nos habitantenan i nos isla en general ta mehorá pa e motibu akí.’
Desaroyonan pa futuro
E desaroyonan pa futuro awor akí ta enfoká riba akomodashon butik di 4 i 5 strea i un nivel di servisio haltu. Pa esaki Entidat Públiko Boneiru den kolaborashon ku stakeholdernan turístiko a formula sierto kriterionan pa akomodashon ku instrukshon pa dunamentu di pèrmit. Ta bai nombra un organisashon independiente pa evaluá e kriterionan akí. Banda di esei Entidat Públiko Boneiru ta invertí den formashon i treinen, di manera ku empleadonan lokal ta haña oportunidat pa studia bai un nivel mas haltu i pa den futuro nan por tin benefisio finansiero di esaki tambe.
