Diputado Nina Den Heyer i Hennyson Thielman a manda un karta pa minister Kasha Ollongren, kaminda nan ta ekspresá nan sorpresa tokante ekspreshon di minister den Parlamentu hulandes.
Den kuadro di maneho di energía na e islanan Karibense, Ollogren a bisa ku lo yuda konservá energía si hende baña ménos largu i hasi ménos uso di èrko.
E minister a hasi su ekspreshonnan tambe a base di un estudio ku a laga hasi dor di e kompania Milieu Centraal. Sin embargo, e estudio a tuma lugá solamente via di internèt, netamente un medio na kual hendenan ménos pudiente tin ménos akseso.
E diputadonan den nan karta ta skibi tambe ku lo ta mihó pa gabinete Rutte tuma desishon pa kaba, pa loke ta trata invershonnan na WEB. “Esaki lo hasi nos produkshon di koriente hopi mas duradero i sostenibel”, asina e diputadonan a skibi.
Preshon
Gobièrnu di Boneiru, huntu ku WEB N.V. pa lunas ta poniendo preshon na Hulanda pa kaba di tuma desishon tokante invershonnan nesesario i urgente pa renová fasilidatnan di produshon na e kompania. Gabinete Rutte, ya ku e ta dimisionario, no ke tuma desishonnan importante mas.
