Riba djaluna 26 di yüni den un forma festivo a tuma e outomatisashon nobo di biblioteka den uso. For di man di señora Alian Spelde, hefe di departamento di biblioteka, diputado Kroon a risibí e promé tarheta nobo di biblioteka i e mes a skèn e bukinan ku e kier a fia.
Ku e sistema nobo di biblioteka konosí komo Wise di OCLC, un laso di kolaborashon mundial di biblioteka, un mundu ta habri pa habitantenan di Boneiru. Habitantenan ku bira miembro di biblioteka no solamente por fia e bukinan ku tin den e biblioteka na Kaya Gramèl, pero fásilmente nan por fia ‘e-books’ tambe. Digitalmente tin mas ku 40.000 título disponibel pa e miembronan di biblioteka i banda di esei 10.000 buki pa skucha, un kantidat grandi di revista, podcast i kurso grátis pa tantu trabou komo privá.
Pa medio di e wèpsait nobo di biblioteka ‘bibliotheekbonaire.com’ no solamente e biblioteka online ta aksesibel, pero e katalòk di bibiloteka tambe ta visibel. Riba e wèpsait miembronan di biblioteka por regla hopi kos, manera buska den katalòk i reservá òf prolongá buki. Muchanan ku ke sa mas tokante buki pa hòben òf un sierto tópiko, por haña informashon tantu den biblioteka komo via e wèpsait pa por ehèmpel nan charla ku nan tin ku presentá dilanti klas (spreekbeurt) òf e obra ku nan tin ku traha tokante un tópiko (werkstuk).
Banda di e outomatisashon nobo di biblioteka i e wèpsait nobo tin un app nobo tambe disponibel pa miembronan di biblioteka. Den appstore por haña e app ‘Bibliotheek Wise’. Pa medio di e app akí e fiadó di biblioteka por buska, hasi reservashon, prolongá etc. tambe.
Tur hende ku awor akí ta miembro kaba di biblioteka por pasa tuma un tarheta nobo di biblioteka na biblioteka. Ku e tarheta nobo nan ta haña akseso na tur fasilidat di biblioteka.
Bo no ta miembro di biblioteka ainda?
Miembresia ta grátis te 18 aña i for di 18 aña e ta kosta $ 6,- pa aña pa habitantenan di Boneiru.
