Diputado Thielman ta comete violacion serio di ley, Thielman tin cu tene honor na su mes Etica den politica ta determinante pa fortifica e confiansa cu miembronan den Conseho Insular den representacion di pueblo Boneriano mester tin den e mandatarionan cu nan ta nombra como diputado, Asina lider di M21 Daisy Coffie a duna di conoce.
Ora e confiansa ey haña un sla ta un regla no- skirbi cu esun cu a causa e desconfiansa ta tene honor na su mes y no ta laga Conseho Insular expresa esaki den un mocion. Diputado Hennyson Thielman a reta Conseho Insular pa tin confiansa den dje, pasobra e acusacion cu e compania Hype Event Planner lo ta operando un edificio pa tene evento cu no ta dispone di un permit di construccion, ta un insinuacion sin base cu e meta pa hiba un politica bou di nivel.
E diputado a sostene su ponencia hasta indicando cu el a para tur actividad di e compania cu por crea of aparenta di crea conflicto di interes pa su persona den funcion di diputado. Pa duna e prueba cu Conseho Insular por confia den su integridad, el a pidi gezaghebber, como protector di bon gobernacion y integridad di gobernacion, pa haci un investigacion riba e compania Hype Event Planner. Den caso di diputado Thielman su integridad ta dobel pisa ya cu e ta diputado tanto di e directorado cu ta duna permit, esta Planificacion di Desaroyo, como di e directorado cu ta controla validez di permit, esta Supervision y Mantencion di Ley.
Resultado di e investigacion di parti di gezaghebber ta pone den un carta fecha 5 di september 2023 y esaki ta confirma cu e compania, Hype Event Planners no tin permit di construccion, pero si un permit di tene evento. Por cierto diputado Thielman den e reunion di Conseho Insular di 11 di juli 2023 ta referi varios bes na “nos compania”.
E cuestion pues cu a tene un evento den un edificio sin permit di construccion a keda confirma pa gezaghebber a base di un investigacion. Conscientemente Diputado Thielman a crea confusion y un impresion robes cerca tanto Conseho Insular como pueblo di Boneiro, pa medio di tira blof y urgi gezaghebber pa laga haci investigacion riba status di nan permitnan, mientras cu diputado tabata bon na altura cu nan compania no tin un permit di construccion na e sitio menciona. Construi sin permit ta un acto cu ta contra ley. E exigencia pa permit ta prescribi pa ley y ta hancra den Ordenansa di Construccion Boneiro, den e Decreto di Construccion BES y tambe den Plan di Desaroyo Teritorial Boneiro. Ta trata di leyynan vigente. Pa medio di traha sin permit di construccion, e compania conscientemente a falta cu ley segun Dais Coffies di M21.