Diputado Nina den Heyer a gradisí 20 kòki ku durante e último lunanan boluntariamente a kushiná 12.500 kuminda na Rum Runners pa hende den nesesidat. Esei a sosodé durante un bishita ku e diputado a hasi siman pasá serka e kòkinan. E proyekto di kuminda a bira posibel danki na donashon di Rotary i medionan di Entidat Públiko Boneiru. Den promé instante e proyekto tabata intenshoná pa un periodo di 7 luna. Pero awor ku el a resultá asina eksitoso i nesesario, Den Heyer ke wak si por kontinuá kuné den futuro.
Na luna di mart di e aña akí, suministradónan i restorantnan a haña nan ku merkansia ku a keda para. Durante e krísis a bira evidente tambe ku hende den nesesidat ku ta haña un pakete di kuminda, hustamente den e tempu ei por a hasi bon uso di un kuminda grátis. E grupo di enfoke aki tabata konosí kaba na Direktorado di Komunidat i Kuido. E ora ei restorant Rum Runners a pone su propio kushina disponibel. Binti kòki ku pa motibu di e krísis temporalmente no por a traha, tabata dispuesto pa boluntariamente duna nan aporte. Empleadonan di Direktorado di Komunidat i Kuido tabata entregá e kumindanan serka e klientenan. E último lunanan semanalmente a kushiná i entregá 450 kuminda.