Ora nos yuda un persona den necesidad, nos no mester spera nada di e persona ey bek, pasobra e pago
di locual nos a haci ta bini directamente di Dios y no di e persona.
Pesey no haci bon na hende, y despues papia of reclama cu e persona no a demostra gratitud, pasobra
locual bo a haci ta pa glorifica e nomber di Dios,
Tur hende mester sa locual Dios su palabra ta bisa:
Esun cu tene misericordia di un hende pober, ta fia Señor y E lo page pa su bon obra. ( Proverbionan
19:17).
Ma ora bo ta duna limosna, no laga bo man robes sa loke bo man drechi ta haci, pa bo limosna keda
den scondi, y bo Tata,cu ta mira den scondi lo recompensabo.( Mateo 6:3-4).
Ora bo haci bon na hende dilanti di Dios, bo no ta keda sin haña bo recompensa, pasobra Dios mes ta
recompensa tur esnan cu haci bon na nan prohimo, y e ta bini ora cu bo no ta spera, y si bo bida ta
dedica na Cristo Hesus, bo tin dobbel recompensa aki na tera y tambe den cielo.
Bon obra no ta salba ningun hende, no pensa cu bo ta biba malo , contra boluntad di Dios, meymey di
malicia, inmoralidad, orguyo, amargura y falta di pordon, y haciendo bon obra lo bo ricibi salbacion,
Palabra di Dios ta bisa den Efesionan 2:8-9:
Pasobra pa medio di gracia boso a wordo salba door di Fe, y esey no di boso mes: e ta don di Dios, no
como resultado di obranan pa ni un hende no gaba.
No laga ningun hende pensa of kere cu pasobra e ta duna na pober, porta di cielo ta habri pe
absolutamente cu no.
Palabra di Dios ta bisa cu nos mester kere den Cristo Hesus pa nos tin bida eterna, un hende por haci
bon obra y keto bay ta bibando bao di condenacion, pasobra e no a kere den e Yiu unigenito di Dios (
Juan 3:18).
Nos tur conoce e historia di un gran traficante di droga cu tabata distribui of bende droga casi rond
mundo, y tambe matando hende pober y importante, y cu e placa cu e tabata ricibi, e tabata traha cas, y
veldnan di futbol pa comunidad, esey ta locual ta bay rond riba mundo awendia, haci bon obra cu
placa sushi, placa di sanger, placa di corupcion, Y nada di e cosnan ey no ta hiba hende na cielo.
Pasobra nan ta mustra bon den bista di hende, pero e tipo di hechonan asina no ta agrada Dios.
Pasobra si no tin arepentimento y aceptacion di Cristo Hesus personalmente no tin salbacion y bida
eterna.
Un hende por haci bon, pero si su bida ta den scuridad,inmoralidad,abominacion y e no kier sali,
aunke e sa cu e ta robes, su hacimento di bon obra no ta forma parti di su salbacion y bida eterna.
Tur loke boso haci, haci boso trabao di curason,como pa Señor, y no pa hende, sabiendo cu for di
Señor boso lo ricibi e recompensa di e herencia. Ta Señor ta Esun cu boso ta sirbi. Pasobra esun cu
haci malo lo ricibi e consecuencianan di e maldad cu e a haci, y esey sin distincion di persona.(
Colosensenan 3:23-24).
Esaki ta un palabra fiel y e cosnan aki , mi kier pa bo confirma constantemente pa esnan cu a kere den
Dios, percura di haci bon obra, E cosnan aki ta bon y di probecho pa hende. ( Tito 3:8).
Sinceramente, Pastor Marcel Balootje.