Departamento di IMpuesto (DIMP) di su banda ta purba pa bini cu tur sorto di regla pa tur doño di auto cumpli cu nan debernan, tanto cu DIMP como cu nan seguro.
DIMP ta traha estrechamente cu e companianan di seguro riba e area aki. Ya caba por ehempel, pa paga belasting di vehiculo di motor, mester mustra cu tin seguro valido.
Pa e aña 2021 y 2022 a dicidi cu e carchi actual ta keda vigente. Den aña 2021 tin un 78.3% di clientenan a cumpli cu nan pago, sea completamente (46.8%), of cu mitad. Esnan cu a paga mita so mester paga e otro parti na luna di juli mientras cu esnan cu no a cumpli a haya un cobransa riba cual a agrega e boet pa pagamento laat.
E ley vigente ta bisa cu e departamento di impuesto ta bay otorga e plachi di number, e mester controla cu e persona su auto tin un seguro vigente. Si no ta bay otorga e plachi otro aña e ora no por controla cu e tin un seguro vigente.
Directora di DIMP Luenne Pieters ta kere cu awo mester tin madurez y e companianan di seguro mester traha cu DIMP di un forma diferente pa nan tin un Sistema cu ta mustra cual cliente a paga nan seguro y cualnan no. Pero tambe un forma pa pone nan cumpli cu e pagonan. DIMP no por bay haci e rol di compercio y tampoco asumi responsabilidad di e companianan ora cu ta trata di nan clientenan. P’esey ta importante nan mester tin un Sistema pa controla nan cliente. Esaki ta importante pa ora di accidente, tanto e number y seguro ta paga.
SI DIMP haci e trabou, mester cambia e ley y duna DIMP e poder pa actua. Pero e ta un cuestion cu mester sinta na mesay bini cu un Sistema.
Aruba tin rond di 88 mil plachi y ta imposibel pa otorga e cantidad aki den un luna di tempo. E ta un trabou imposibel. Por ehempel, el a bisa, cu vacuna tres mil hende ta dificil. DIMP ta custumbra pa den su momento top entrega maximalmente 2 mil plachi pa luna. E ta exigi hopi tempo pasobra cada plachi ta diferente.
Awo e sistema aki ta uno anticua pasobra na mayoria pais rond mundo e number di plachi ta uno fiho y ta keda e mesun plachi. Ya caba tin e pensamento pa haci un adaptacion. E ta algo cu por bay otorga cada cinco aña un plachi nobo na momento cu e auto mester bay DTI pa keur. E ta un Sistema cu ta beneficia e control di parti di diferente departamento. DIMP ya caba a duna su conseho pa evita cu contrinuyentenan e.o. mester para oranan largo den solo pa haya esaki. E lo ta facil si e impuesto di auto, seguro y keuring wordo paga bou di un solo dak. Esaki ta algo cu DIMP ta trahando caba riba dje y e prome paso ta pa traha un concepto di ley cu lo mester discuti cu stakeholdernan.
A recorda tur ciudadano cu ta vigente e opcion pa paga cada luna un suma di belasting di auto y asina cu juli yega, e number por ta completamente paga. “Por fabor ta pidi contribuyentenan cuminsa paga riba e di dos pago for di awo,” Luenne Pieters a bisa.