Na juni / juli aña 2023, Biblioteca Nacional Aruba a organisa dos curso di Skirbimento Creativo, uno pa Principiante y tambe uno pa esnan Avansa, duna dor di escritor Vi Frank Jr, escritor di entre otro e prome thriller na Papiamento, titula “Damnatio ad Bestias” (Condena n’e Bestianan), y e coleccion di storia misterioso titula “Outpost Alto Vista”, un obra den e genero di Cosmic Horror.
Mescos cu na final dje curso duna na 2021, caminda a duna e alumnonan oportunidad pa publica un coleccion di nan storia y poesianan, e biaha aki atrobe sr. Vi Frank jr a duna su cursistanan e oportunidad pa entrega storia y poesia, pa dje moda aki atrobe conhuntamente saca un publicacion. Na aña 2022 a publica e coleccion titula ‘Maraca, un sentimento Caribense produci den diferente storia y poesia local’. Un produccion cu 8 escritor cu a participa n’e curso y cual titulo ganado a ser entrega dor di sra. Noris van Lis. E aña aki e produccion ta encera no menos cu 15 escritor cu a participa n’e dos cursonan (Principiante y Avansa). E titulo di e produccion ta ‘Halado, Un coleccion di storia y poesia local’, cual titulo ganado a ser entrega dor di sra. Ida Croes.
Diabierna awo, 1 di maart, cuminsando pa 5’or di atardi, Biblioteca Nacional Aruba tin e placer di presenta no solamente e produccion aki, pero Vi Frank Jr. lo sorpresa un y tur cu presentacion di un buki nobo, cual titulo y contenido el a sa di mantene secreto. Presentacion di ambos buki ta na biblioteca na G. Madurostraat 13 y ta cuminsa pa 5or di atardi te 7or di anochi. Pueblo en general ta invita pa bin pasa un rato ameno acompaña pa anecdota, poesia, pasapalo, y algo pa muha e garganta.
