Richard Dirksz, miho como como Didi, ta un di e keepernan mas exitoso den historia di Aruba su futbol, destacando den su ekipo di Dakota y tambe den selección di Aruba.
Didi a cuminsa cu SV Dakota-Junioren na 1982. Na aña 1983, Didi Dirksz a wordo yama pa bira reserve keeper den e ekipo di Division Honor di Dakota cu edad di 20 aña. Na 1984 den un wega pa Copa Antíano contra SUBT di Corsou, Didi ta haci su debut despues cu e prome keeper, Baron Tevreden a lesiona.
Na aña 1985, Didi a bay biba na Hulanda pa su estudio y lo bin biba bek na Aruba na aña 1992. Na 1994, Didi ta bek cu Dakota. Na aña 1995, Didi ta titula Campeon cu Dakota y Didi ta sali e MVP di campeonato. Na 1998, Ddi lo bira sub-campeon cu Dakota. Despues di e campeonato 1998, Didi ta retira un rato como hungado y lo forma parti di bestuur. Pero ora e keeper di Dakota haya un lesion grave na 1999, e directiva a pidi Didi pa yuda un biaha mas como keeper. Y na aña 2000, Didi a logra titulo di subcampeon un biaha mas cu Dakota.
Didi Dirksz a forma parti di seleccion di Aruba. E debut den selección tabata na 1994 contra Boneiro. Na 1998 Didi Dirksz como keeper lo conoce un campaña exitoso den Shell Cup 1998, ora Aruba ta logra un victoria (contra French Guiana), un empate contra Suriname y un solo derota (vs Antías Hulandes). Na aña 2001, un biaha mas lo representa Aruba den torneo di Concacaf “Copa Caribe” na Suriname.
Didi despues cu a stop a fungi un aña (2005/ 2006) como keeperstrainer di Estrella su keeper Eric Abdul, e aña ey Estrella ta tiutula campeon tambe. Na 2008 Didi lo titula campeon di Fedeveta cu e equipo di Caravel 35+, bao guia di sr. Roy Helder (dfm). Y na aña 2009 hunto cu Jair Oduber ta lanta team di veterano Dakota Starz 35+, cual ekipo lo titula campeon pa 5 aña consecutivo.
