Diasabra awo ta bay tin un seminario di Aruba Center for Leadership Development Foundation durante cual e asistentenan por haya inspiracion for di en total di cinco orador. Dos di nan ta orador internacional.
E dos oradornan internacional ta Elke Busschots y Gert Mertens. Ambos ta co-fundador di e compania True-Core. Localmente lo t’ey drs. Samuel Dumfries, Daniele Ferrara (Chief Strategy Officer di Gianni’s Group) y Giandra de Cuba (Level Up Leadership).
Strategia, bon maneho di tempo pa evita stress ta un di e temanan cu lo bini dilanti e mainta aki. Daniele Ferrara lo bay duna poco tip valioso na personanan cu awendia ta ocupa un posicion di supervisor of gerente y cu ta haya nan mes cu hopi trabou. E charla lo ta concentra hopi riba delega trabou pa abo como un supervisor of manager por ta mas efectivo. Delegando trabou e hefe lo por yega na haci su mesun trabou mas miho.
Segun Ferrara, delega ta un aspecto hopi importante den compania grandi y chikito, y tambe den departamentonan di gobierno. Compania ta pone presion pa tin miho resultado y ta importante e ora pa cada persona den e empresa (departamento) sa bon kico ta spera di cada un di nan. Y no mester lubida, mas confiansa cada miembro di e team tin, miho e empresa ta bay funciona.
E tipo di seminarionan aki ta bale la pena pa sacrifica mita di bo dia liber. E ta algo pa bo mes como un trahado, cu lo yuda bo crece den tur sentido. Pero e ta masha importante pa cualkier lider di un empresa cu na e momentonan aki ta sinti su mes hopi bou di presion pa e cantidad di trabou y resultado cu ta spera di nan.
E evento cu lo tuma luga na Boulevard Events lo tin sesion interactivo cu ta un plus punt mas pa e participantenan.