Konseho Sosial Ekonómiko (SER) di Kòrsou ta hasi un yamada
fuerte pa intensifiká e kooperashon entre paisnan di habla Hulandes den Karibe pa asina ei, den
konsulta ku otro, enfrentá retonan sosial i ekonómiko komun. E yamada aki ta bini despues di un
tayer di dos dia, organisá pa Organisashon Internashonal di Trabou (ILO), ku a tuma lugá 11 i 12 di
òktober último na Hotel Torarica, Paramaribo, Sürnam. E evento aki a pone enfoke riba e situashon di
Sürnam, i a trese huntu representantenan di gobièrnu, di sektor empresarial i di organisashonnan di
trahadónan Surinameño pa fortifiká e futuro di diálogo sosial bipartit i tripartit na e pais Suramerikano.
Durante e tayer, dos tema importante a ser ampliamente diskutí, ku ta formalisashon di e sektor
informal i un transishon hustu pa un ekonomia sostenibel. Segun un eksperto ku a asistí,
"Formalisashon di e sektor informal ta esensial pa garantisá protekshon sosial i pa mehorá
oportunidatnan di trabou."
E tayer tambe a destaká vários opstákulo ku ta stroba efikasia di diálogo sosial na Sürnam. Un di e
desafionan mas grandi ta falta di konfiansa mutuo entre e interlokutornan sosial—gobièrnu,
empleadonan i trahadónan. Vários partisipante a enfatisá ku "sin konfiansa i rèspèt, kualke diálogo ta
destiná na frakasá,"
Gobièrnu i sektor privá di Sürnam a asistí na e tayer. Representantenan di Ministerio di Trabou,
Empleo i Asuntunan Hubenil i tambe grupo di empresarionan, manera Vereniging Surinaams
Bedrijfsleven (VSB) i e Asosiashon di Fabrikantenan di Sürnam (ASFA), huntu ku e sindikatonan
Sentral di Organisashon di Funshonarionan Públiko (CLO) i e Federashon di Organisashonnan
Profeshonal di Sürnam (SBOF), tabata presente.
Na fin di e tayer, e partisipantenan a enfatisá riba e nesesidat agudo di trainingnan spesialmente
dirigí riba (r)establesé konfiansa i maneho di konflikto, i tambe a hasi un yamada pa yega na un
struktura di diálogo mas sentralisá. E fragmentashon aktual di organisashonnan ta pone ku
desishonnan ta tarda mas i e koördinashon ta defisiente. Un struktura mas sentralisá lo aselerá e
proseso di toma di desishon i tambe lo yuda fortifiká koöperashon entre e interlokutornan sosial i hasi
uzo mas efisiente di rekursonan tékniko i finansiero, ku lo permití ku e diálogo sosial tripartit ta mas
efektivo.
SER di Kòrsou, ku riba nivel tékniko tambe tabata presente na e tayer, a kompartí su eksperensia,
enfokando riba e nesesidat i balor agregá di tin un sosten tékniko i atministrativo fuerte, ku ta permití
un preparashon adekuá di e diálogo sosial pa asina interlokutornan sosial por hiba e diálogo di un
forma efektivo i efisiente. “Intensifiká e koöperashon eksistente entre Aruba, Kòrsou, Sint Maarten,
Sürnam i tambe e islanan BES, i kompartí ku mas frekuensia bon práktikanan, lo yuda nos solushoná
retonan komun den reforma di nos merkadonan laboral i den kombatí desigualdatnan sosial mas
efektivamente,” segun e konklushon di SER.