Tur aña riba 27 di september ta celebra Dia Mundial di Turismo. Celebracion di e Dia Mundial di Turismo tin como meta pa promove e importancia di turismo y su balor social, cultural y economico. E tema di e aña aki ta ‘Turismo i Inversionnan Verde’, cu ta enfatisa e necesidad pa inverti den proyecto ku ta na beneficio di hende, planeta i prosperidad.
Inversion den hende pa medio di educacion i desaroyo di abilidatnan, inversion den nos planeta pa medio di infrastructura sostenibel i aceleracion di e transformacion berde, i inversion den prosperidad pa medio di invasion, tecnologia i emprendementu. E Oficina di Turismo di Corsou (CTB) ta sostene e tema di e aña aki, destacando e importancia di inversion sostenibel den hende, planeta i prosperidad pa beneficia e desaroyo di turismo di Corsou.
Den su mensahe oficial den e contexto di e tema di Dia Mundial di Turismo di 2023, Sr. Zurab Pololikashvili, Secretario General di e United Nations World Tourism Organization (UNWTO), a declara: “E Dia Mundial di Turismo aki nos ta reconoce e tema di Turismo y Inversionnan Verde. E tema aki ta hopi oportuno, pasobra e aña 2023 lo ta e aña mas calor cu a yega di registra. Y eventonan extremo manera ola di calor por bira e normalidad nobo. Turismo mester adapta. Nos mester haci mas facil pa inversionistanan di tur sorto apoya proyecto di turismo cu tin e potencial pa haci un diferencia. Mirando mas leu den futuro, nos mester di inversionnan cu por empoderá turismo pa construi un futuro miho i mas husto pa tur hende.
Pa CTB, e tema di e Dia Mundial di Turismo di 2023 ta importante tambe pa Corsou. E crecemento di e cantidad i calidad di turista cu ta keda na Corsou mester bay man den man cu inversion den hende, planeta i prosperidad. E inversion den hende ta inclui por ehempel programanan di entrenamento den e sector di hospitalidad, manera esakinan cu ta wordo ehecuta actualmente, i tambe e introduccion di turismo den scolnan primario, cu a cuminsa aña pasa, i e hotel di enseñansa caminda studiantenan por siña i tambe experencia e sector. Tur esaki ta accionnan cu ta contribui na inversion den hende como parti importante di desaroyo di nos turismo. Pa loke ta trata e aspecto di inversion den e planeta, nos mester busca formanan pa acelera e proceso di transformacion berde den e sector di turismo.
E aspecto di e transformacion berde no ta solamente pa motibo di problemanan ambiental, pero tambe pa e demanda creciente di e biaheronan cu ta busca destinacionnan cu ta alinea cu nan balornan di responsabilidad ambiental y social. Por ultimo, pa inverti den prosperidad, ta importante pa crea oportunidadnan pa mas invasion i apoya e desaroyo di negoshi, producto i/of servicio nobo na beneficio di e industria di turismo. CTB lo sigui traha hunto cu Ministerio di Desaroyo Economico (MEO) i otro partnernan den sector publico i priva pa contribui na realisacion di proyecto cu ta stimula inversion den hende, planeta i prosperidad. curacaochronicle.com