Majan, 20 di maart nos Seccion di Cuido Dental Hubenil (Jeugdtandzorg) ta uni nos mes na Federacion Dental Internacional (FDI) pa celebra dia Mundial di Salud Oral.
E meta di e dia aki ta pa comparti informacion, conocemento y brinda apoyo pa nos tur por goza di un boca saludabel. Ta ser calcula cu enfermedadnan oral manera caries dental y malesa di carn’i djente ta afecta 3.9 biyon hende rond mundo. Esaki ta haci enfermedadnan oral un di e condicionnan di salud mas comun mundialmente. Ademas malesanan di boca y djente por tin un impacto negativo riba nos salud general.
Un boca saludabel ta permiti nos papia, hari, smaak nos cuminda, kauw, guli y mustra nos emocionnan cu confianza , sin dolor ni molester. Ademas salud oral ta esencial pa un bon calidad di bida.
Ora nos mantene nos boca y djentenan saludabel, esaki por yuda den un forma positivo serca personanan cu ta diabetico. Un boca saludabel por yuda preveni tambe malesanan di curazon, pulmon y algun tipo di cancer. Boca y djentenan saludabel ta necesario pa nos salud general por ta optimal.
E bon noticia ta cu nos por controla e cuater factornan principal di riesgo pa malesanan oral, cu ta inclui un dieta no saludabel (hopi sucu), uzo di tabacco (cigaria, ciga, pipa etc), uzo excesivo di alcohol y un higiena oral deficiente. Ademas ora nos controla e cuater factornan di riesgo aki nos por yuda preveni otro malesanan cronico manera esunnan cu nos a menciona anteriormente.
Un boca saludabel ta cuminsa cu un bon higiena oral, tumando nos tempo pa skeiro djentenan y lenga y haciendo uzo di skeiro y pasta di djente adecuado. Nos dentista of higienista dental por recomenda nos ki tipo di skeiro di djente y pasta nos por uza. Tambe nan por conseha nos tocante e uzo di un mouthwash. Nos no por lubida e hilo dental of otro tipo di metodo pa haci meymey di e djentenan limpi. Teniendo na cuenta e tres otro factornan di riesgo nos por baha e cantidad di sucu cu nos ta uza diariamente, evita tabaco y alcohol.
E bishita regular na dentista pa controla e boca y e djentenan ta un parti importante pa nos por yega na un bon salud oral.
Nos tur kier ta orguyoso di nos boca y di nos sonrisa.