BACKGROUND
Dia Mundial di Medio Ambiente dirigi pa UNEP (Programa di Nacionan Uni pa Medio Ambiente) y
celebra cada 5 di junio desde 1973, ta e plataforma mundial mas grandi pa concientisacion
ambiental y celebra pa miyones di persona den henter mundo.
TEMA PA 2024: Restoracion di Teranan, Desertificacion y Resiliencia contra Secura
#GeneracionRestoracion
Nos no por bay back den tempo pa coregi e erornan cometi den e trato di nos medio ambiente y en
particular nos teranan, pero si nos por reforesta, restorando y reintroduciendo e vegetacion natural
tanto den mondi como areanan habita, revitalisa e fuentenan natural di awa dushi y restora e suelo.
Nos ta e generacion cu por haci paz cu nos teranan.
Actualmente ta e Decada di Nacionan Uni pa Restoracion di Ecosistema (2021-2030), e Decada di
Nacionan Uni di Ciencia Oceanico pa Desaroyo Sostenibel (2021-2030), e Decada di Nacionan Uni
di Agricultura Familiar (Cunucu, agricultura escala chikito) (2019-2028) y e Decada Internacional pa
Accion “Awa Dushi pa Desaroyo Sostenibel” (2018-2028), cual tur tin di haber cu restoracion di
teranan, desertificacion y resiliencia contra secura.
MENSAHE DI SECRETARIO DI NACIONAN UNI, ANTONIO GUTERRES
E tema pa Dia Mundial di Medio Ambiente e aña aki ta “Restoracion di Teranan, Desertificacion y
Resiliencia contra Secura”. Humanidad ta depende di teranan. Sinembargo, rond mundo un cocktail
toxico di polucion, chaos climatico, y eliminacion di biodiversidad ta convertiendo teranan fertil y
sano den desiertonan y ecosistemanan vivo y prospero den zonanan morto. Nos ta anihilando
mondi, boske y areanan di vegetacion habri y minando, cabando cu e forsa di bida di teranan pa
sostene ecosistema, agricultura y comunidadnan.
Y como consecuencia cultivonan den agricultura ta bayendo perdi, fuentenan natural di awa dushi ta
desapareciendo, economianan debilita y comunidadnan ta core peliger- di cual esnan pober impacta
mas duro cu tur otro. Desaroyo sostenibel ta sufriendo. Y nos ta keda atrapa den un circulo mortal,
ya cu uso di teranan ta responsabel pa 11% di emisionan di dioxido di carbono cu ta causando
keintamento global. A bira ora pa sali for di e ciclo vicioso aki
Paisnan mester cuminsa cumpli cu compromiso haci pa restora tera y ecosistema degrada, y cu
henter e Kunming-Montreal Framework Global pa Biodiversidad. Nan mester aprobecha di usa
plannan nacional pa accion climatico nobo pa defini con pa para y reverti deforestacion y perdida di
vegetacion natural pa 2030.
Ademas nos mester aumenta drasticamente financiamento pa yuda paisnan den desaroyo adapta
na fenomenonan di tempo violento, proteha naturalesa y apoya desaroyo sostenibel. Inaccion ta
costando nos caro, pero medidanan rapido y eficas tin sentido di e punto di bista economico. Cada
dollar inverti den restoracion di ecosistema ta genera te cu trinta dollar den beneficio economico.
Nos ta Generacion Restoracion. Hunto, laga nos construi un futuro sostenibel pa teranan y
humanidad.
Collaborative Research – ICT for development – Governance –
Treaties Monitoring with focus on SIDS
Press inquiries: Email: press.rwicore@gmail.com
Facebook: https:/www.facebook.com/rwicorefdn
Aruba Chamber of Commerce Register no. S.582.0
PO Box 1154, Oranjestad, Aruba, Dutch Caribbean
SITUACION NA ARUBA
Un sobredesaroyo sin debido planificacion di turismo a largo plazo a conduci na un aumento
drastico den perdida di teranan natural cu mata, tanto den mondi como area habita y tambe pa
agricultura. Degradacion di ecosistema y tambe tereno pa agricultura a causa impacto riba e
biodiversidad na Aruba en particular pa especie endemico manera nos shoko, prikichi, raton pata
blanco, raton di anochi y algun mata manera palisia blanco y cora.
E creacion di nos Parke Nacional Aruba, cu fuera di Parke Arikok tambe ta inclui e zona humedo di
Spaans Lagoen, cuater area di Parke Marino Aruba y mas di un dozijn area mas tawata un
comienso pa den forma structura conserva naturalesa y proteha biodiversidad di alrededor di 30% di
nos teritorio nacional.
Pero sin un Ley pa Maneho di Medio Ambiente y sin un Ley pa Maneho Maritimo, keto bay ta
posibel cu hotel por ser construi den areanan vulnerabel banda di area cu ta cay den Parke Marino y
of Parke Nacional Aruba, manera den e caso di Secrets Resort na Seroe Colorado.
Y keto bay teranan natural ta ser degrada dor di uso di vehiculo offroad (UTV y ATV). Cu e aumento
drastico di camber di hotel y unidad di Airbnb biniendo online ta premira un necesidad grandi pa
vivienda nobo y ampliacion di nos infrastructuranan den areanan habita y di interconecccion.
Planificacion di zonanan terrestre (ordenacion teritorial), esta planificacion geo-espacial terestre y
planificacion geo-espacial marino pa areanan costal y di laman den paisnan isla chikito den
desaroyo (smaill island developing states, SIDS) ta bay man den man y hopi biaha de facto por
considera practicamente e teritorio completo como area costal, manera den caso di Aruba.
Fuentenan di awa dushi pa agricultura na Aruba practicamente no ta existi mas, cu posnan di awa
dushi y dam conteniendo awa contamina. Pa nos restora ecosistema, restora suelo, restora
vegetacion natural y revitalisa fuentenan di awa dushi ta bay rekiri introduci e Ley di Maneho pa
Medio Ambiente y e Ley pa Maneho Maritimo.
Recientemente a ser teni e di Cuater Conferencia Internacional pa SIDS di Nacionan Uni, 27-30 mei
na Antigua.
Rainbow Warriors Core Foundation como UNICO NGO accredita a participa den e conferencia aki y
a enfoka riba temanan di resiliencia climatico, e papel estelar di ciencia den desaroyo sostenibel,
conservacion di biodiversidad, maneho di data y infrastructura digital pa desaroyo sostenibel y en
particular pa planificacion geo-espacial terestre y marino.
Den e ultimo cuadro aki a atende e presentacion titula “Restoring Coastal Community Economies
Through Innovative Technologies, Coastal Resilience and Restoration”. E presentacion tawata
consisti di dos panel, uno dunando un introduccion di tecnologianan cu ta usa y genera data geo-
espacial manera entre otro satelite y sensor (remoto y local) y con pa haci uso di modelo digital pa
planificacion terestre y marino predecibel pa areanan costal pa asina por anticipa y mitiga
vulnerabilidadnan y riesgonan causa pa cambio climatico.
E di dos panel tawata conisti di e programa di Blue Community, esta “Restoring Coastal Community
Economies through Coastal Resilience and Restoration” den cual diferente stakeholder a presenta
case studies con pa atende cu e tematica aki. E di dos panela a ser modera dor di Robertico (“Tico”)
Croes, profesor di University of Central Florida’s Rosen College of Hospitality Management. Experto
den creacion di strategia pa maneho di desaroyo sostenibel di turismo pa SIDS, e la ser invita
recientemente dor di presidente di Asamblea General di Nacionan Uni pa duna un lectura den e
High-Level Thematic Event on Tourism, parti di e promer Siman di Sostenibilidad di Asamblea
General di Nacionan Uni.
E presentacion aki tawata un excelente introduccion na tecnologia y strategia util pa restoracion di
ecosistema, tera, combati perdida di vegetacion y revitalisacion di fuentenan di awa dushi,
hustamente e tema di Dia Mundial di Medio Ambiente 2024.
