Cada aña riba 10 december ta celebra Human Rights Day, Dia di Derecho Humano, ariba e mesun dia cu na 1948 e Asamblea General di Nacionan Uni a adopta e Universal Declaration of Human Rights (UDHR), esta e Declaracion Universal di Derechonan Humano (DUDH).
E DUDH ta consisti di un preambulo y 30 articulo cu ta establece un gran variedad di derecho humano y libertadnan fundamental riba cual un y tur y na tur parti di mundo tin derecho.
E declaracion ta garantiza nos derechonan sin distincion di nacionalidad, lugar di residencia, genero, origen nacional of etnico, religion, idioma of cualkier otro condicion.
10 december 2023 lo celebra e di 75 aniversario di e Declaracion Universal di Derechonan Humano. Cuminzando 10 december 2022, riba Dia Internacional di Derecho Humano Nacionan Uni ta lanzando un campaña cu duracion di un aña cu e meta pa presenta e DUDH, concentrando riba su relevancia, activismo, logronan y temanan central entre otro pa logro di e Obhetivonan di Desaroyo Sostenibel (Sustainable Development Goals, SDGs).
Tema pa dia internacional di derecho humano 2022: dignidad, libertad y husticia pa un y tur
E tema pa e aña aki ta “Dignity, Freedom and Justice for All” esta “Dignidad, Libertad y Husticia pa Un y Tur” y e yamada pa accion internacional cu hashtag #StandUp4HumanRights.
Y e dia aki ta inicia un campaña pa un aña pa promove y reconoce e 75 aniversario di e DUDH.
E DUDH a ser skirbi y redacta pa representante di tur region di mundo cu un diversidad grandi den background legal y cultural. Cu tempo e la ser acepta como un contrato social entre gobiernonan y nan respectivo pueblonan. Practicamente tur estado na mundo a acepta e DUDH.
Den e decadanan despues di adopcion di e DUDH na 1948 derechonan humano a gana den reconocimento y den nan aplicacion como garantianan legal.
E DUDH a sirbi como base pa crea un sistema di proteccion di derecho humano ancra den un cantidad di tratado cu ta atende cu un variedad amplio di derecho y como tal tambe ta sirbi pa formula na nivel local ley y maneho politico pa cu derecho y libertad fundamental y particularmente pa gruponan vulnerabel manera personanan cu limitacionan, pueblonan indigena y migrantenan.
E DUDH tambe ta un fundeshi pa e 2030 Agenda pa Desaroyo Sostenibel, cual mediante su Obhetivonan di Desaroyo Sostenibel (SDGs) ta promove economia cu ta inverti den derecho humano y cu ta trece progreso y bienestar pa un y tur.
No obstante, e promesa di dignidad y igualdad di e DUDH a bin ta sufri di atakenan incesante e ultimo añanan. Cu mundo cada dia mas enfrentando reto existente y nobo, manera pandemia, conflicto, desigualdad explosivo, corupcion y un sistema global financiero moralmente bancarota, racismo, extremismo politico y impactonan di cambio climatico, e valornan y derechonan ancra den e DUDH mester sigui como guia pa nos accionan colectivo pa laga ningun hende atras.
Hende a frustra y a perde confianza pa via di loke ta ser percibi como inaccion y irelevancia di gobiernonan y institucionan pa proteha derechonan humano. E hubentud y muchanan no ta sinti cu nan voz ta ser scucha of sa mes di e existencia di e DUDH.
E campaña cu un duracion di un aña tin como meta pa reorienta nos trabou y e medidanan pa un mihor reconocimento di e universalidad di e DUDH y e activismo asocia na esaki pa lucha pa promove y defende derechonan humano y libertad fundamental.
E idioma di e Declaracion tin e potencial pa vence division y polarisacion. E por crea paz cu naturaleza, nos planeta, y punta nos den e direccion pa un mihor caminda pa yega na un desaroyo sostenibel pa futuro generacionan.
E lucha pa y defensa di derechonan humano na nivel local
Aruba y Reino Holandes ta partido den un gran cantidad di tratado pa derecho humano.
Recientemente Aruba den delegacion di Reino Holandes a presenta den e Universal Periodic Review di derechonan humano na Suiza nan resumen di e esfuerzonan pa cumplimento, implementacion, monitoreo y documentacion di tratadonan vigente den Reino Holandes y Aruba.
Loke ta resalta ta e falta di e voz di sociedad civil na Aruba pa monitorea tratado y raporta violacion di derecho humano na Aruba den casi tur area di derechonan humano y libertadnan fundamental.
Y mas ainda ta parce cu cierto voznan a ser stroba di por resona, particularmente den e ambito di derecho laboral, derechonan di grupo vulnerabel manera hende cu limitacionan, hende grandi, derecho pa un standard di bida acceptabel, derecho na un sistema di salud adecuado, y derecho na acceso di instrumento legal pa acceso na informacion y instrumentonan pa corregi actonan di sector publico cu ta perhudica ciudadania.
E problema di Venezuela cu un regimen politico cu ta pone hende busca un bida mihor den exterior, a pone cu Aruba a ser inunda, mescos cu Curacao cu un fluho grandi di hende, mas tanto migrante, pero tambe persona buscando asilo politico of status di refugiado.
Pa atende cu e problematica aki di mas di 12.000 persona na Aruba a opta pa pone gran parti di administracion y logistica den man di United Nations High Commissioner for Refugees, International Organization for Migrants, HIAS y ultimamente tambe Pan American Development Foundation.
Esaki a resulta den un coordinacion bon organiza, ehecuta y staf amplio di personal pa atende cu tema di migrante, refugiado etc. Diferente iniciativa a ser tuma cu subsidio for di exterior.
Gobierno di Aruba cu e outsourcing aki a crea un problema, ya cu den otro area di derecho humano pa e poblacion general, esfuerzo a keda atras, no existente of fondonan disponibel a ser corta.
E resultado ta xenofobia, pasobra segun gran parti di pueblo “pa stranhero tur cos ta ser atendi, pero pa e rubiano mes nada”, y pa cual motibo HIAS a inicia un campaña pa atende cu xenofobia.
Pa atende debidamente cu derechonan humano, mester promer cu tur cos combati corupcion, bin cu sistema di capacitacion di tanto sector publico como sociedad civil, fiha prioridadnan segun necesidad y no segun disponibilidad di fondo limita den presupuesto y involucra experto den sociedad civil local en bes di pone tur esaki den man di consultants of institucionan internacional cu no ta colabora cu NGOs local en pugna di e 2030 Agenda pa Desaroyo Sostenibel.
