Ya pa algun siman caba Jhon Freddy Montoya, lider di proyecto di Departamento di Cultura Aruba, ta planeando hunto cu e tecniconan di Cas di Cultura, Omar Brown y Elton Malone, filmacionnan special pa Dia Internacional di Baile, cual anual ta cay riba dia 29 di April. Den temporada di COVID-19 produccionnan digital a subi, tambe na Cas di Cultura, pa keda duna aliento y alivio pa medio di arte y un medio pa expresion pa esnan trahando den arte y cultura, cual a prueba di ta indispensabel e aña nos tras.
E colaboracion a resulta den un number record di produccionnan di video, traha den apenas tres dia, poni online homenagiando baile. Riba e paginanan di Facebook di Cas di Cultura y Departamento di Cultura un total di 18 video por wordo admira. Esakinan ta estrena un candidat grandi di lidernan di baile na Aruba, di ballet clasico, pa folklor, baile contemporaneo, latin, aerial dance, hip hop, etc. Aparte di e videonan como producto, sigur puentenan a wordo traha y crusa den e mundo di baile cu tambe a haya su slanan door di COVID-19. Ta yama un danki grandi na representantenan y maestra y maestronan di Club di Movimiento, NTG & NLT, Popcorn Dancers, Kozlov Dance Academy, La Pachanga, Jeanira Wernet, Aerial Dance Aruba, Step by Step Dance Studio, Scol di Baile Diana Antonette, Wilma Kuiperi, Madeleine Kelly y su grupo, Muchanan Sabi y Kids & Youth In Action. Tambe na maestro pianista Johnny Scharbaay cu a toca tur ritmo bou di solo pa acompaña tur bailador.
Baile ta un language international cu tur hende ta “papia” y no ta un dia so nos ta balore, pero henter aña. Nos ta mustra y expresa aprecio na tur e lidernan, maestra y maestronan cu ta dedica diariamente pa haci bida na Aruba un tiki mas bunita, ritmico, melodico y cu menos stress pa medio di e Arte di Baile.
Publico ta keda cordialmente invita pa mira tur e videonan cu a wordo poni riba Facebook, cual tambe ta enrikese e archivo digital di nos personanan clave na Aruba pa cu baile. Keda pendienta mas programacion di baile profesional y alentador, organisa pa Cas di Cultura y su partnernan, mas leu den aña.
