Diadomingo dia 1 di oktober ta marca e celebracion di Dia Internacional di Adulto Mayor. Na 1991, Nacionnan Uni a proclama oficialmente dia 1 di oktober como e dia pa honra y celebra e contribucion invaluable di nos adultonan mayor den comunidadnan mundial. Ariba e dia aki e adulto mayor ta central den nos mente. No solamente pa honra y reconoce nan contribucion y aporte na nos comunidad, pero tambe pa detene na diferente asuntonan cu ta afecta e grupo aki na Aruba. Esaki ta un dia pa nos refleciona ariba temanan crucial manera:
Sostenibilidad y enbehecemento: E cantidad di adulto mayor na nos isla ta creciendo. E pregunta ta, con nos por brinda sosten na nan, y den ki forma nan por sigui contribui na nos comunidad?
Bida Digno pa Adulto Mayor: Ta crucial pa reconoce e derecho y e importancia di brinda un bida digno na tur adulto mayor den nos comunidad. Kico nos por haci pa asegura nan bienestar optimalmente?
Inclusividad Tecnologico: Esaki ta e tema cu Nacionnan Uni a scohe pa di e aña aki y ta resalta e brecha digital cu ainda tin entre adultonan mayor y e avance tecnologico di e ultimo decadanan. Apesar di e revolucion digital, tin hopi cu no tin suficiente acceso na tecnologia moderno. Un maneho strategico pa educa nan den uso di internet, celularnan, Ipad, laptop, y computer, segun nan necesidad, ta vital pa nan independencia y seguridad. E profesionalismo den e proceso mester asegura nan salud y bienestar.
Apesar cu na Aruba no tin un tema specifico pa e dia internacional aki, nos kier trese bou atencion di un y tur, cu cada un di nos tin e oportunidad pa refleha riba e situacion di e grupo di adulto mayor den nos comunidad. Nos por para keto na preguntanan manera, “Kico ami por haci pa contribui na bienestar y felicidad di un of mas adulto mayor awe?”. Tambe e ocasion aki ta brinda un espacio pa refleha riba nos propio futuro como adulto mayor y e cambionan necesario pa crea un ambiente na unda tur adulto mayor por disfruta di un bida digno. Nos tur tin un rol den esaki, y nos a pidi pa considera den ki forma nos por aporta pa enrikece e bida di nos sernan keri di edad mas avansa.
Na Aruba, nos tin 125 Telefon pa Adulto Mayor, cu ta disponibel pa adultonan mayor cu ta desea compania den forma di un combersacion. E persona cu yama por papia cu boluntarionan cu ta entrena y cu t’ey pa brinda atencion y un orea pa scucha. Por lo pronto e servicio ta disponibel di dialuna pa diabierna di 8.30 AM pa 12.00 PM, cu e meta di amplia e dianan y orario.