Fundacion Kapel di Bethania (FKB) lo habri e portanan di Klooster Imeldahof un biaha mas diasabra 18 di maart di 9 or di mainta pa 2 or di merdia, pa asina celebra nos dia nacional hunto cu pueblo di Aruba. Lo percura pa e dia aki tin un ambiente familiar cu actividad tanto pa grandi y chikito.
E hobennan di Pastoral Hubenil Noord lo ta encarga e dia aki cu un “art workshop” pa tur edad, esaki tin un costo di solamente Afl 15,-. Nan ta organisa esaki pa recauda fondo pa yuda nan den nan gastonan pa bay e ‘Hornada Hubenil Mundial’ na Portugal.
Por pasa admira nos exposicionnan den Kapel y den e otro cambernan.
Tambe lo tin un bazar, caminda por pasa cumpra snacks, cos dushi, acesorionan, articulonan religioso y mucho mas. Y di mes lo tin un bar y cushina bon sorti.
Igmar Maduro lo entretene publico cu su caha di orgel, Tica Giel lo canta algun composicion di Aruba acompaña na piano pa Igmar Maduro, Madeline Kelly lo duna un presentacion cu su grupo di baile, Luis Figaroa, maestro riba acordeon, lo deleita e publico cu piesanan tipico hunto cu su grupo crioyo. E presentacionnan lo cuminsa 11 or.
Riba e dia aki esnan cu ta interesa pa yuda cuida y conserva e edificio monumental di Klooster Imeldahof por registra alavez pa bira boluntario.
Fundacion Kapel di Bethania ta invita henter pueblo di Aruba pa bin pasa un rato placentero cerca nos, disfrutando y siñando di nos historia y cultura.
