Joselien Croes ta presidente di comision nacional di metanan mundial pa desaroyonan sostenibel (Sustainable Goals Development SDG’s). Dia 25 di september awo ta un dia hopi importante pa mundo y pa Aruba tambe unda cu 8 aña pasa e metanan pa un desaroyo sostenibel a wordo adopta door di mayoria di e Pais nan miembro di Nacionnan Uni.
Esaki a keda duna cu e obhetivo pa crea un miho mundo pa tur hende. Segun Joselien Croes esaki ta pa crea un miho calidad di bida pa tur hende y tambe pa ta sigur e mundo ta mas igual. Esaki ta pone cu lo wak den diferente aspectonan di e desaroyo di Aruba cu no ta wak solamente e desaroyo economico, pero ta wak esaki ta balansa cu aspectonan social , aspectonan ambiental, y pa tin e institucionnan fuerte.
Segun Presidente di metanan mundial pa desaroyonan sostenibel Joselien Croes esaki ta un agenda di speransa pa crea un miho futuro pa tur hende. Loke cu tambe ta bunita ta cu den e metanan tin indicadornan cu tur hende por traha cu nan y no ta algo cu ta gobierno so mester duna di su parti , pero tambe ta pa organisacionnan mane NGO’s nan gobernamenta, pero tambe na sectornan priva. Si mester mira esaki di cerca, si tur hende mester pone nan mes den e mes un direccion por logra cosnan grandi pa e Pais.
Segun Presidente di metanan mundial pa desaroyonan sostenibel Joselien Croes loke ta mas importante ta e agenda pa logra pa tur hende cambia nan manera di pensa con nos ta biba riba e planeta aki. E hende mester ta mas consiente con ta bay om cu nos medio ambiente, kico nos mes ta haci pa no tira desperdicio afo, pero tambe con nos ta trata otro hende, dus e parti social unda cu lo mester crea un agenda di igualdad.
Tambe tin un aspecto importante pa focus pa caba cu pobresa, caba cu hamber pa asina tin un miho nivel di desaroyo, pa tin mas igualdad di genero y tambe pa tin un miho infrastructura den un Pais y pa ta mas sostenibel.
Un aspecto cu tambe ta hopi importante ta pa Aruba tin un miho calidad di bida bao di lama paso esey ta nos beach , pero tambe un miho calidad riba tera. Tur loke cu nos tin riba tera tambe tin influencia den nos lama y Visa Versa.
E agenda di Sustainable Goals Development SDG’s ta un bunita agenda y e ta uno mundial cu nos tur por carga hunto y pone nos cabes den mes un direccion pa un miho mundo. Actualmente tin hopi actividad cu ta tumando luga. Nacionnan Uni mes lo tin un SDG Summit cu lo tuma luga 18 y 19 di september na News York pa asina por conmemora e 8 aña nan di trabao , pero tambe wak ainda unda falta pa cumpli cu e metanan proponi pa un miho mundo.
Sinembargo nos mester ta honesto cu nos mes cu ainda mayoria di hende riba mundo no ta consciente di e consecuencianan con mundo ta bayendo, Sinembargo esaki ta un realidad. Ta di lamenta cu e ser humano ta para keto solamente na momento cu algo pasa, porehempel na momento cu tin horcan of unda cu tin inhundacion, pero segun Presidente di metanan mundial pa desaroyonan sostenibel Joselien Croes nos sa cu e nivel di lama ta subiendo, nos clima ta birando mas calor y esaki ta e impacto riba tur cos y riba nos bida.
E serhumano no ta para keto y pensa kico e desaroyonan aki ta significa pa abo mes como serhumano riba e planeta aki. Nos mester keda duna atencion na e puntonan aki y haci e comunidad mas consciente riba e parti nan aki y pa e ser humano mes cuminsa haci di su parti pa nos por tin un miho mundo pa biba aden mirando tur e desaroyonan di naturalesa cu ta tumando luga.
