Dia 10 di febrüari último, Tourism Corporation Bonaire (TCB) den kolaborashon ku Diamond PR Agency a risibí Palina Kozyrava, kende ta un di e “Lifestyle & Travel” “blogger” mas eksitoso i Instagram “Influencer” aleman, na Boneiru. Resientemente, e “blog” di Palina a sali den e tòp 15 “blogs” mas importante di Alemania, di e revista aleman di ekonomia “Wirtschaftswoche”. E “blog” di Palina ta konsistí di temanan
manera biahe, beyesa, bida, moda i mas.
E kontenido di biahe ta ekslusivo i luhoso, pero tambe e ta kontené destinashonnan bunita, outéntiko i ku no ta wòrdu mira frekuentemente. Tambe Palina tin mas ku 250 mil siguidó riba Instagram. Palina a biaha pa Boneiru huntu ku su pareha i manager Maximilian Schiefer. Palina i Maximilian a keda na un di e vilanan na El Pueblo i na Courtyard by Marriott Bonaire.
Durante di nan estadia, nan a eksplora algun di e kuebanan na Boneiru, nan a eksperensiá “land sailing” i nan a snòrkel na varios sitio. Palina i Maximilian a namorá di Boneiru asina tantu ku nan a disidi di ekstendé nan estadia te ku fin di febrüari. Pa lesa i mira tokante di Palina su estadia na Boneiru, por bishita e siguiente website i página sosial: http://www.palinakozyrava.com/travel http://www.instagram.com/palinakozyrava
Na komienso di febrüari, TCB den kolaborashon ku Diamond PR Agency tambe a risibí Sonja Fröhlich di e revista Focus Magazin, kual ta un di e tres (3) revistanan di mas grandi na Alemania. Durante di su estadia na Boneiru, Sonja a keda na One Ocean Apartment i na Djambo Apartments, i a traha riba proyektonan ku su koleganan na Alemania via internèt. Sonja a skirbi i a publiká un artíkulo di kuater (4) pagina tokante di “workation in Bonaire”, inkluí imágennan di Boneiru den e revista aleman Focus Magazin.
Durante di su bishita na Boneiru, Sonja a bishitá diferente arianan kaminda estudionan ekológiko ta tuma luga i tambe a tene un entrevista ku Caren Eckrich, kende ta e lider di biologia na STINAPA. Tambe Sonja a bishitá Cadushy Distillery i a purba e Chef’s Table na La Cantina. Den futuro binidero, lo publiká un di dos artíkulo di Boneiru ku e enfoke riba vakashon na Boneiru. TCB ta yama danki na tur partner ku a partisipá pa hasi e eksperensia di Palina, Maximilian i Sonja na Boneiru, unu inolvidabel.
