Di dos Tino Ruiz Walk and Run un exito rotundo

750 persona a participa!

Diadomingo mainta trempan participantenan  y famia a yega cerca pa duna sosten ne e di dos Tino Ruiz Walk and Run. Esaki a tuma lugar na e recién inaugura Plaza Tino Ruiz situa na Noord.

Den presencia di Minister di Husticia y Asuntonan Social Sr. Rocco Tjon, Altocomisario di Polis Sr. Ramon Arnhem conhuntamente cu e famia di defunto Tino Ruiz a haci e inicio di e careda.

Altocomisario Arnhem a hiba palabranan di sosten y gratitud na e famia cu a bini hunto y recorda un bunita momento . Tino Ruiz semper a gusta  move y haci deporte pero mas aun keda fit! Altocomisario a hiba un areglo di flor na e busto di Tino Ruiz pa asina por dune su honor y respet.

Pa exactamente 5:50 di mainta e prome gruponan uniforma a sali bou di e pito di altocomisario di Polis sigui despues pa e careda cu participacion di 750 participante. Bou e pitonan cu e famia a los e careda a aali exactamente pa 6’or di mainta.

Na final di dia tabata tin coremento di 3km, 1.5km como tambe 200 meter pa nos hobennan y chiquitonan cu tambe a duna un resultado fructifero mirando e acogida masal cu pueblo a sa di responde na e di dos Tino Ruiz Walk and Run. Danki na tur persona cu a yuda, comision, patrishisports pero tambe nos comunidad y agentenan policial cu a bini hunto pa un bon causa!