Rhythms Circus Company (RCC Aruba) ta conoci localmente pero tambe mundialmente pa nan logronan increibel den e mundo di circo. E grupo a representa Aruba na un nivel internacional y a gana varios premio y reconocimiento pa nan talento y profesionalidad. Nan a presenta riba e escenarionan di mas grandi y popular, manera America’s Got Talent, Budapest Circus Festival, Hippodrome England, y hopi mas.
Na e comienzo di oktober 2023, RCC a cuminsa cu un reta grandi pa asina nan por sigui hiba Aruba su nomber dilanti internacionalmente. E biaha aki, nan a biaha mas di 14,000 km di Aruba t’e cu China pa representa nos isla na e Wuqiao International Circus Festival. E evento aki ta un tradicion na China pa 36 aña caba, y e ta conoci pa uni e miho acrobaatnan na mundo.
E biahe pa China a dura 3 dia largo, pero ta algo cu, pa RCC Aruba, tabata bale la pena. Nan a acepta cu hopi orguyo pa tin e honor di representa nos isla y competi riba e mesun escenario hunto cu otro gruponan sumamente talentoso den nan linea di trabao. E grupo di acrobacia local a keda na China pa 3 siman pa por prepara adecuadamente y train riba un escario nobo.
Manera ta conoci, RCC su acto mas popular ta encera un circulo di candela cu un di e
artistanan balente ta bula door di dje; algo cu ta pone curazon di e publico bati asina duro cu bo por casi scuch’e. Lastimamente, pa motibo cu no tabata permiti candela den e lugar di e evento, RCC a haya nan mes forsa pa sigui cu e show den un diferente manera y experimenta cu efectonan di luz na lugar di candela. Asina mes, nan tabata tin e publico completamente gana cu tremendo reaccion y aplauso. “E tabata un experiencia espectacular cu nunca nos lo lubida, y nos ta hopi agradecido pa e oportunidad.” Diego y Yamila, e dos directornan di RCC Aruba, ta nota.
Recientemente, RCC a regresa Aruba pa sigui demonstra nan talentonan localmente. Bo por wak nan tur diaranson y diabierna na D&Y Cabaret (Paseo Herencia Ballroom) pa experiencia e emocion pa bo mes, y wak e maraviyoso acto di candela dilanti bo wowonan. E grupo talentoso aki ta invita un y tur pa bin disfruta di un experiencia unico pa solamente AWG 25 pa persona, un prijs special cu nan ta ofrece actualmente na tur local pa celebra nan regreso.
Tur reservacion por wordo haci directamente riba nan website www.rccaua.com, unda cu tambe tin mas informacion di cada show. RCC ta conta cu e apoyo di pueblo pa nan por sigui desaroya nan talento y destaca internacionalmente mientras nan ta representa nos isla chikito den exterior; reforsando e concepto cu Aruba, maske chikito, tin un abundancia di talento pa ofrece.
Pa mas informacion, por follow RCC riba Facebook, Instagram, Tiktok, of bishita nan website na www.rccaua.com.
