Diasabra ultimo dia 27 di januari 2024 alrededor di 04.51’or, Central di Polis a ricibi varios yamada tocante di un maltrato cu tabata tumando luga na altura di e rotonde banda di Stadion Ergilio Hato.
Mesora a dirigi un unidad pa e sitio. Na yegada di e unidad, el a topa un homber cu un herida basta serio na su cabes.
For di investigacion preliminar a sali na cla, cu probablemente e victima lo a causa destruccion na auto di e otro homber, y e ultimo aki a agredi’é cu un obheto na altura di su cabes.
Ambulance a transporta e victima pa Sala di Emergencia di C.M.C., mientras cu na e sitio mes polis a detene e homber I.E.N.B. di 46 aña di edad nasi na Corsou y a confisca e vehiculo.
A presenta e sospechoso dilanti un fiscal auxilia cu a orden su encarcelamento pendiente di mas investigacion.