Tabata un momento di hopi orguyo pa michael lafortune, fundadó di ‘a plastic free bonaire – apfb’ durante desvelo di e promé instalashon di separashon di shushi, situá na waf chicu mercelina na playa.
e unidat ta e promé di ocho ku nan ta bai pone na kosta, for di bich di chachacha te na playa lechi. carolyn caporusso, miembro di direktiva di apfb, a bisa ku nos tur tin un responsabilidat pa prevení shushi tirá abou tur kaminda na boneiru. prinsipalmente pasobra ta un menasa pa nos refnan i nos bida bou di laman asina presioso. diputado james kroon a suprayá importansia di e proyekto pa realisá e meta general di un boneiru mas limpi.
a plastic free bonaire a gradisí spònsernan manera budget marine, kooyman, sunbelt realty i dive friends bonaire i e otro partnernan selibon i direktorado di planifikashon i desaroyo pa e echo ku nan a hunga un ròl importante den realisashon i ehekushon di e proyekto. diariamente selibon ta sòru pa hasi e bakinan di shushi bashí.
durante un luna ta tèst e unidat aktual pa wak si mester hasi mehorashon. e unidat ta ofresé baki apart pa kolektá bòter di glas, plèstik i otro tipo di shushi. entre tantu habitantenan i turistanan na boneiru por kustumá ku e echo ku separashon di shushi na boneiru ta birando mas i mas importante. e aspirashon pa yega na un ekonomia sirkular pa medio di reusá produktonan di desperdisio na boneiru, finalmente por kondusí na mas aktividat empresarial i mas empleo na boneiru.
