Diamars mainta 21 di juni, a tuma luga e di dos tripartiet overleg entre Aruba, Corsou y Sint Maarten. Presente tabata Premier Silveria Jacobs di Sint Maarten, Premier Gilmar ‘Pik’ Pisas di Corsou hunto cu nan ekipo di conseheronan.
Durante e reunion a toca diferente tema cu ta den interes comun di e islanan ya cu apesar di e diferencianan, e retonan grandi ta afecta cada isla na e mesun manera, y ta mas facil pa hunto busca solucionnan. Prome Minister Evelyn Wever-Croes a indica cu anteriormente den Gabinete Wever-Croes I ya caba a organisa un tripartiet entre e islanan ruman cu a resulta di ta un experiencia hopi positivo.
Durante e reunionnan di diamars mainta a toca e tema di e palabracionnan haci cu Secretario di Estado di Reino Alexandra van Huffelen encuanto COHO. Akinan e tres paisnan, Aruba, Sint Maarten y Corsou a scoge pa bin cu un alternativa enbes di COHO na unda a palabra ken ta traha riba cierto cosnan pa asina reuni den un otro encuentro na fin di Augustus pa presenta na Hulanda e proyecto final.
Tambe a toca varios tema financiero incluyendo e recorte di 12.6%. Aruba na e momentonan aki ta riba agenda pa Rijksministerraad diabierna awor caminda e condicionnan lo wordo aproba. Gobierno awo ta warda pa Parlamento aproba y pasa e ley di Landverordening Normering Topinkomens, LNT, e asina yama Wever-Croes Norm, pa asina Gobierno cumpli cu e condicion aki y ta wardando tambe riba conseho di CFT. Pero, Prome Minister a remarca, tur cos ta poni pa paga e 5% di salario na tur empleado publico entrante juli 2022.
Premiernan di Corsou tambe na final di e reunion tripartite, a duna nan comentario di e reunionnan intenso cu a tuma luga den poco tempo na Aruba.
Prome Minister di Corsou Gilmar “Pik” Pisas
Premier Pisas a expresa di ta sumamente satisfecho cu e reunnionnan cu a tuma luga entre Aruba, Corsou, Sint Maarten y Hulanda. A raiz di esaki, a haya importante cu tres islanan a reuni un bes mas y sigui delibera riba e palabracionnan haci. ‘Mi ta contento cu e Prome Minister di Aruba cu a bira e ‘trekker’ di e trayecto aki. Asina di biaha nos a sigui dialoga y a haci palabracion pa traha na bienestar di e pueblonan di cada pais y pa garantisa futuro di e futuro generacionnan.’
Prome Minister di Sint Maarten Silveria Jacobs:
Prome Minister di Sint Maarten tambe a expresa cu e reunionnan a bay hopi bon y cu ta sumamente satisfecho cu como tres isla den Reino, ta moviendo hunto dilanti, pa realisa e reformanan cu cada un pais mester. “Nos kier percura pa e reforma tuma luga den forma efectivo y eficiente, sigurando cu nos paisnan ta sostenibel y resiliente.
Prome Minister Evelyn Wever-Croes ta gradici e premiernan di Sint Maarten y Corsou y nan ekiponan pa e reunionnan fructifero cu a tuma luga. “Durante reunionnan asina bo ta realisa con hopi en comun e islanan tin cu otro, especialmente Aruba y Corsou. Uni lo logra hopi mas”, Prome Minister a enfatisa.
