ORANJESTAD, Aruba
Despues di mas cu 1 luna y mei cu Aruba no a conose mas caso positivo di Covid-19, awe DVG ta bolbe registra 2 caso positivo nobo. Ta trata aki di un cluster, dus 2 caso na e mesun cas. Tur dos persona a bolbe Aruba for di Colombia dia 15 juni y a wordo informa door di DVG pa permanese den cuarentena pa 2 siman y a wordo controla door di task force segun protocol.
Tawata diasabra ultimo cu un di e personanan a cuminsa presenta sintoma y a busca asistencia medico. Riba peticion di dokter di cas DVG a haci test di Covid-19 serca tur dos persona cu e resultado ya conoci. Como cu e personanan aki tawata den cuarentena e posibilidad cu nan por a plama e virus ta uno chikito, pero apesar di esaki DVG ta sigui prosedura normal pa averigua si toch e personanan aki por tawata tin contacto cu otro persona.
DVG desde inicio di e crisis di Covid-19 na Aruba a hiba un maneho transparente y lo sigui hiba e mes un maneho aki. No tin ningun motibo pa tapa of sconde ningun informacion pa comunidad manera cu cierto personanan kier insinua. DVG y Gobierno a informa comunidad cu habrimento di nos frontera lo conduci cu nos lo por bay haya casonan nobo. Sinembargo comunidad por ta trankilo pa motibo cu Aruba tin un bon structura pa detecta, isola y controla casonan cu presenta. Loke na comienso di e crisis aki nos como pais no tawata conta cu ne.
Banda di esey Gobierno a percura pa nos capasidad di camanan den ICU a wordo eleva pa di e manera aki por brinda cuido medico nesesario na mas persona.
Durante e lunasnan cu a transcuri DVG y Gobierno a percura pa duna mas hopi informacion posibel riba con cada uno di nos mester cuida nos mes. Es cu a tuma tur conseho y ta practica e reglanan no tin motibo pa tin miedo.
Registro di dos caso nobo di Covid-19 na Aruba no nifica cu planesnan haci pa cu nos reapertura di frontera lo cambia. Plan di reapertura di Aruba su frontera a wordo traha cu miras riba diferente senario y registro di casonan nobo no a wordo descarta nunca.