E tragedia cu a sosode awe mainta a conmove comunidad profundamente, unda un hoben cu despues di a expresa riba su redsocial su lucha contra depresion ta termina poniendo fin na su propio bida. E tragedia aki a conmove esnan presente masha hopi mes, pero tambe esnan cu a mira esaki ‘Live’ via un medio di comunicacion. Presencia un tragedia di e indole aki ta hopi fuerte y por laga bo cu hopi tristesa, pregunta y confucion. Social Psychiatrische Dienst (SPD) pa e motibo aki kier informa na tur es cu mester sosten den e momento dificiel aki pa tuma contacto cu nan den dia for di 7:30am te cu 4:30pm na 5224249 y anochi for di 5:00pm te cu 7:00am na 5924400. Social Psychiatrische Dienst tin Sikiatra y Enfermeronan den ramo di salud mental pa por scucha, duna conseho y duna sosten na es cu mester di dje na e momento aki y den e dianan cu ta sigui.
E crisis di COVID-19 no solamente a afecta nos salud fisico pero e consecuencia di perdida di empleo, perdida di un ser stima y perdida di actividadnan social a hunga un rol grandi riba nos salud mental ocacionando stress, insiguridad, anciedad y depresion. Si bo persona ta den un situacion actualmente cu bo no sa kico pa haci of ta sinti bo mes deprimi of bo ta sinti gana di ‘give up’ sa cu bo por yama SPD 24 ora pa dia, 7 dia pa siman pa ayudo y sosten.
