ORANEJSTAD, Aruba
Despues cu na Dr. Horacio E. Oduber Hospital a surgi un candela dia 16 di juni a keda cu un efecto di huma y alabes a resulta cu tabatin asbest. Pues pa siguridad di pashent, bishitante y empleado a tuma e tempo necesario pa haci un limpiesa profundo y alabes un compania certifica riba tereno di asbest bou encargo di DVG a percura pa saneamento di esaki. Awe despues di algun siman di reto nos ta contento cu awor por habri ful y reanuda tur servicio manera Aruba conoce di Hospital.
Tur servicio di departamento di radiologia ta ser atendi solamente cu cita y e entrada pa esaki lo ta bek via e entrada principal di Hospital.
Operacionnan elecivo tambe a reanuda bek.
En conexion cu Covid-19 ta rekeri pa tur persona cu ta acudi na departamento di emergencia pa bisti un mask. Tambe nos ta recorda cu un persona solamente mag di drenta hunto cu e pashent.
Pa minimalisa riesgo di contagio en conexion cu Covid-19 regla pa loke ta bishitante di pashentnan admiti a cambia desde maart. Ta permiti solamente 1 (un) bishitante mayor di edad (18 aña of mas) pa pashent interna. Esaki lo sosode na un orario fiho cu un duracion di 1 ora. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber.
Tambe ta importante pa menciona cu si un pashent tin Covid-19 e no lo por ricibi bishita pa asina minimalisa riesgo di contagio.
Pa algun pashent tin excepcion cual ta rekeri un dagpas, manera cuido intensivo (ICU), departamento di mucha y maternidad. Tambe tin excepcion den caso cu pashent ta terminal.
Porfabor mantene un bon higiena di man haciendo uzo di nos hand sanitizers situa na diferente lugarnan strategico prome y despues di haci bo bishita.
Un gradicimento di curason ta bay na tur pashent cu a demonstra comprenshon den un situacion poco fastioso y asina mes a keda cu un sonrisa riba nan cara. Alabes na e team completo di cuido cu a duna todo por todo pa e pashent por haya tur loke nan mester pa nan por ta salud. Y no por keda sin menciona e team cu a traha duro tras di cortina pa HOH por a reanuda su servicio lo mas lihe den un forma safe. Aunke a pasa den inconveniencia boso tur a mustra comprension y colaboracion.