No ta un secreto cu Directie en infrastructuur en planning (DIP) ta pasando den un proceso. DIP tin un instruccion pa cumpli cu ne cu ta e retrasonan cu tin y esaki e director no ta cumpli cu ne, Tin varios persona tin un cantidad aña ta wardando y hasta nan a tuma caminda di corte pa haya nan derecho of pa nan keda atende y pa nan por haya un contesta. Hopi di e procesonan ta bay hopi slow y tambe hopi malo, EA News a bin ta informa esaki desde un inicio di tur e comerciantenan cu ta yega na mesa di redaccion y ta conta nan frustracion di e mal maneho den DIP y con nan a keda perhudica. Nos tur sa cu Director di DIP Haime Croes ta sospechoso y tabata bao di investigacion pa un tempo basta largo door di e investigacionnan cu tabatin den DIP.
Ultimo prome minister a haya informacion cu no tin mas investigacion ta tumando luga den DIP y cu OM a bisa cu pa falta di prueba a para cu e investigacion contra di e sospechoso e tempo ey Marisol Tromp y cu ta pone cu no tin ningun motibo mas pa DIP ta bao di investigacion.
Segun Prome Minister Evelyn Wever Croes esaki ta pone cu DIP mester cuminsa ehecuta e decisionnan di gobierno pa elimina e retrasonan cu tin. Tambe gobierno no ta esun cu lo mete den DIP, kende si of kende no mester haya tereno, pero si gobierno ta pone instruccion y esunnan cu a haci peticion mester haya contesta.
Gerencia a presenta un maneho y gobierno ta den e proceso di cambia e maneho mirando cu gobierno no ta di acuerdo cu tur cos. Na momento cu e maneho ta cla e ta keda publica y mester ehecuta e maneho manera e ta, esaki ta pone cu no por tin faboritismo den dunamento di tereno.
Ningun tereno cu DIP ta maneha ta di DIP mes pero e ta di pueblo di Aruba y esunnan cu a haci peticion merece un contesta y gobierno ta spera di DIP cu den cada un cu ta traha den DIP nan traha cu e integridad di mas halto cu tin.
DIP tambe ta den e Landspakket y mester structura e departamento y awo varios cambio ta bay tuma luga na bienestar di e departamento. Awo cu Ministerio Publico y Director di DIP Haime Croes no ta den DIP mas procesonan mester cana y cada kende cu a haci un peticion mester por haya nan derecho cu nan ta ser contesta kico ta pasa cu nan peticion.
DIP tin un papel hopi grandi pa desaroyo di Pais Aruba y e desaroyo aki a keda frena debi cu e director di DIP no ta capas pa e posicion como director di DIP y e la demostra esaki den varios ocasion unda cu a ocasiona diferente blunder y cu tin un cantidad grandi di casonan den corte cu lo costa Aruba hopi placa. Esaki ta muestra cu e director di DIP no ta capas pa e posicion cu e ta bin ta eherciendo den tur e añanan na DIP y ta ocasionando problema so den e departamento y pa pais Aruba unda cu e economia a keda paralisa pa su motibo.
Gobierno di Aruba a keda man mara y ciudadanonan y comerciantenan a keda perhudica door di director di DIP Haime Croes y esaki ta un situacion cu no por sigui mas. Gobierno di Aruba a tuma e decision y DHR ta manda un carta di TOEGANGSONTZEGGING na director Haime Croes unda cu dialuna mainta e no por drenta oficina di DIP y e mester entrega di Badge y yabi di oficina y tambe su computer. E director di DIP a keda suspendi inmediatamente. EA News a ricibi informacion for di fuentenan di DHR cu e decision aki no a bay asina facil, mirando cu mester a evalua hopi situacion, sinembargo e echo ta cu den e investigacion a sali hopi cos na cla unda cu e director di DIP a gaña riba varios comerciante y a hinca diferente comerciante den diferente problemanan severo door di gaña cu nan ta sospechoso den un of otro caso.
Awo lo cuminsa cu e proceso pa investiga e director di DIP Haime Croes di su mal maneho den DIP unda cu varios comerciante cu ta pilar di economia di Aruba a keda perhudica, pero tambe e pueblo humilde cu a keda perhudica y stanca pa nan por haya un pida tereno pa nan traha nan cas.
Varios comerciante a entrega keho contra di director di Haime Croes y awo lo e ta bao di investigacion di su mal maneho cu e la haci y gaña stancando e economia di Aruba unda cu ta prohibi e trahadonan pa traha riba e peticionnan di e comerciantenan cu e ta sinta ta yama sospechoso siendo cu no ta berdad.
Awor un aire fresco lo cuminsa waya den departamento di DIP y solo lo cuminsa Sali geel geel fuerte y procesonan lo mester cuminsa cana manera e structura ta indica. Aki por mira cu Minister di Infrastructura Evelyn Wever Croes ta cumpliendo den loke e ta bin ta bisa cu e lo drecha tur e departamentonan di gobierno pa cana bon y segun regla y leynan pa asina e pueblo di Aruba haya su trato merece y ayudo manera debe ser. Na e mes un momento ta para tur hende cu tin nan propio agenda den DIP cu no ta cana segun regla y ta stop cualkier ciudadano tambe of comerciante cu ta kere cu nan por cumpra cualkier ambtenaar pa nan por pasa over di tur e ciudadanonan humilde.
Awor merecidamente Aruba mester por duna Prome minister Evelyn Wever Croes e espacio mereci pa asina e sigui demostra cu e ta traha pa e pueblo di Aruba unda cu tur hende tin derecho riba e pidi baranca aki pa keda bon atende for di cualkier departamento di gobierno.
