Honorabel lidernan di CARICOM,
Ku es karta aki Nos Ke Boneiru Bek (NKBB) kier informa e liderazgo di CARICOM di e intento di Hulanda pa desvia e atenshon di nan kontinou krimen kontra humanidat dor di un asina yama deskulpa pa sklabitut ku mitar kurason. E gobierno Hulandes ta kontinua kometiendo krimen kontra e pueblo Karibense, dor di kontinua ku kolonisashon di nan teritorionan subordina Karibense te ku awe.
Na mes momento ku e Hulandesnan anunsia deskulpa pa sklabitut I un budget di 200 mion euro pa lanta konsiensa pa sklabitut, nan ta finansia e gera na Ukraina ku 500 mion. Nos lo ke rekorda e liderazgo Karibense ku e aneksashon illegal di nos isla Boneiru na 10 Oktober 2010, ku Hulanda a atkeri 200 miya nautiko di Zona Ekslusivo Ekonomiko den Laman Karibe Sur den kwa nan tin poder absoluto dor full gobernashon kolonial for di Den Haag, Hulanda. E menasa ta real (wak nos kartanan di 2018 I 2019 riba e provokashon di Hulanda di Venezuela) Karibe komo un zona di paz ta pasado ku Boneiru 50 miya for di kosta di Venezuela I e Hulandesnan ekspandiendo e airport mas alew ku standard komersial pa standardnan militair.
Mas alew, NKBB tin ku rekorda kada lider Karibenjo di e interes diripiente di Hulanda den Karibe Sur, ku Venezuela, Surinam I Guyana su petroli I gas komo e kosta di oro emergiendo.
NKBB ta urgi pa CARICOM no kai den e triki di deskulpa Hulandes. E Hulandesnan ta konsiente ku e liderazgo di CARICOM ta hopi serio konsierniendo e trajektoria di reparashon pa sklabitut. E prinsipal obhetivo di Hulanda mester wordu komprende pa dividi e liderazgo Karibense, mientrastanto nan ta kontinuando ku agenda kolonial depopulashon I limpiesa etniko di e pueblo Boneriano pa supstitushon ku inevitablemente lo dirigi na desaparishon di e nativonan Boneriano komo pueblo Karibense.
E promesa di 200 mion euro pa konsientisashon pa su mayoria lo wordu gasta na Hulanda I ta kita for di presupuesto di eradikashon di pobresa di implementashon di projektonan di Millenium Development Goals I Sustainable Development Goals. Hulanda a usa e strategia aki di priminti fondo internashonal I di Nashonan Uni pa eradika pobresa pa destrui I disolve Antia Hulandes na Oktober 2010 I nunka a mantene su promesa. NKBB ta spera ku e konseho den e karta aki lo hanja un orea pa skucha serka e Sekretario General I liderazgo di CARICOM Hefenan Di Estado I por enforsa e determainshon pa kaba ku kolonialismo.
