Hopi konfundí mi a keda di a risibí e siguiente informashonnan for di Kolegio Ehekutivo.
Den Presidio di 1 di febrüari 2022 riba mi pregunta “Ken ta representá Boneiru na Union Europeo?”, Gezaghèber a kontesta: “Ta ami ta TAO” i a bisa ku te a bai Bruselas di bishita na Union Europeo último tempunan.
Awor den pitu, promé ku bishita di sra. Samira Raphaela, Gezaghèber ta informá Konseho Insular ku ta numa dia 2 di febrüari último Kolegio Ehekutivo a nombr’é komo “Territory Authorized Officer” (TAO).
Sinembargo dia 25 di febrüari 2022 diputado Thielman ta saka un komunikado ku ela traspasá su tarea komo TAO pa gezaghèber di Boneiru.
Na promé lugá mi mester bisa ku mi ta kontentu ku alomenos Boneiru a nombra Gezaghèber ofisial pa por representá nos isla na Union Europeo. Sigur ora mi a tuma nota ku riba e lista di proyektonan di Komishon Europeo ku a keda finansiá pa un total di 385,4 mion Euro pa e periodo di 2021 pa 2027 kaminda Aruba, Saba, Sint Eustatius i Sint Maarten si ta keda menshoná ku nan respektivo proyektonan i Boneiru no.
E forma kon ta atendé ku interesnan di nos isla na Europa no ta meresé un premio.
Pa nos di Konseho Insular haña un bista kla i al kaso di nos relashon ku Union Europeo mi ta hasi uso di Reglamento di Órden artíkulo 45 pa hasi e siguiente preguntanan ku e petishon pa haña kontesta verbal den e próksimo reunion públiko di Konseho Insular.
- Kiko a pasa ku Boneiru no ta riba e lista di proyektonan di Komishon Europeo ariba menshoná?
- Tantu den e karta di gezaghebber fechá 11 di febrüari 2022 dirigí na Konseho Insular komo den e komunikado di diputado Thielman ta referí na proyektonan andando. Konseho Insular por haña informashon detayá di kada un di e proyektonan aki inkluyendo pero no limitá na fecha di petishon, aprobashon, kon nan a kana òf ta kanando, nan status aktual i kiko e resultadonan ta?
- “From the blue sky” na kasi fin di un periodo di gobernashon nos ta bin komprondé ku ta diputado Thielman tabata enkargá ku e tarea aki. Konseho Insular ke risibí e desishon kaminda a nombra diputado Thielman pa e funshon di TAO.
- Kuantu biaha diputado Thielman a bishitá Union Europeo òf a risibí representantenan di Union Europeo?
- Kua ta e proyektonan/programanan ku Boneiru a entregá na Union Europeo pa e periodo di gobernashon aktual pa finansiamentu i ku ki resultado?
Mirando e importansia ku UNION EUROPEO tin pa paisnan LGO i kaminda a amplia e oportunidatnan pa por hasi un apelashon riba finansiamentu di proyektonan i programanan den e kuadro aki, mi ta sugirí Kolegio Ehekutivo lo siguiente:
- En bes di nombra un konsehero riba e aria aki, ta mihó pa Kolegio Ehekutivo konsiderá lantamentu di un büró c.q. departamento pa atendé ku esakinan.
- E büró aki lo por ta enkargá entre otro ku buska i duna informashon mas amplio posibel na nos komunidat pa nan tambe tin konosementu di e posibilidatnan ku Union Europeo ta brinda.
- Por krea un tim di ekspertisio (kisas no permanente) pa skirbi e proyektonan di tal forma ku nan ta kumpli ku tur e eksigensia i kondishonnan ku Union Europeo ta rekerí pa bin na remarke pa finansiamentu.
- Por kombiná e departamento aki ku e enkargo pa buska invershonista inovativo pa asina nos diversifiká nos ekonomia basá riba e klima di invershon positivo ku nos a krea spesialmente riba tereno fiskal (nùltarif riba impuesto di ganashi).
- Krea spesialmente partisipashon di nos hóbennan profeshonal pa nan haña oportunidat di eksperimentá ku ideanan inovativo riba diferente aria den nos komunidat.
Ku esaki mi ke a duna un insentivo pa kuminsá pensa den e direkshon aki. Opviamente mi ta inspirá pa e echo ku e tipo di yudansanan aki no mester ta insidental òf mará na un periodo di gobernashon pero mester krea kontinuidat. I e kontinuidat aki na mi pareser no ta garantisá den duna e tarea aki ni na diputado, ni na gezaghèber, pero mester institushonalisá esaki.