Aruba Airport Authority N.V. (AAA), e compania cu ta maneha y opera Aeropuerto Internacional Reina Beatrix (AUA Airport) ta contento pa anuncia e siguiente informacion:
TUI Fly Belgium lo reanuda servicio temporal semanal entre Brussel, Belgica (BRU) y Aruba (AUA), cuminsando dia 3 di April, 2022 te cu 23 di Oktober, 2022.
Desde 3 di April, 2022, TUI Fly Belgium lo opera su Boeing 787-800 cu e capacidad di 300 asiento, for di Brussel via Republica Dominicana pa Aruba.
TUI Fly Belgium lo ofrese buelonan semanal riba diadomingo cu ta sali for di BRU pa 9:00 am y ta yega AUA 3.05 pm, cu un tempo di biahe estima di 12 ora y 45 minuut.
TUI Fly ta un marca di TUI Airlines Belgium y ta forma parti di e TUI Group, e grupo turistico mas grandi na mundo, cu su oficina principal situa na Hanover, Alemania.
TUI fly ta traha segun un concepto hopi simpel: si bo ta un hende cu ta gusta ‘haci-tur-cos-bo-mes’, of si bo tin bo propio acomodacion, of ta biaha pa motibonan profesional, bo por reserva un ticket pa vuelo y/of un auto di huur na TUI fly na un prijs atractivo. TUI fly ta ofrese tambe varios servicio adicional y opcional, manera seguro contra gastonan di cancelacion of seguro di biahe y asistencia.
“Esaki ta un noticia fantastico, mirando cu e servicio aki lo trese aproximadamente 4,050 pasahero for di Belgica pa Aruba via Republica Dominicana. Nos ta contento cu TUI fly Belgium ta mira e potencial den nos destinacion y cu nan a anuncia cu nan lo reanuda servicio temporal pa Aruba. Nos ta ansioso pa e servicio adicional den futuro, pero mientrastanto nos lo ta felizmente wardando pa yama bonbini na e pasaheronan na Aruba,” asina CEO di AAA Joost Meijs a bisa despues cu e mes a ricibi e grato noticia.