Locual un hende permiti drenta su mente ta domina y determina su bida.
*Tin hopi relacion ( noviazgo) ta cologa na un hilo pa motibo di desconfiansa y mal pensamento.
*Cuanto matrimonio no ta den kibra pa motibo di mal pensamento y desconfiansa.
*Cuanto hende su trabao no ta na peliger pa motibo di desconfiansa y mal pensamento.
*Cuanto hende no a perde nan puesto den cualquier organisacion pa motibo di desconfiansa,
*Hopi hende ta keda sin haña trabao pa motibo di nan propio mal pensamento y desconfiansa.
*Cuanto hende no a bandona nan famia (esposa y yuinan) pa motibo di desconfiansa y mal
pensamento.
E enemigo di nos alma cual ta e diabel ta e campeon di trece mal pensamento, y desconfiansa den tur
relacion, sea ta matrimonial, spiritual, famia, laboral,etc, pasobra e ta enemigo di union.
E palabra di Dios ta splika nos hopi cla den Filipensenan 4:8 bisando:Finalmente , rumannan , tur loke
ta berdadero, tur loke ta honorabel,tur loke ta husto,tur loke ta puro,tur loke ta bunita, tur loke ta di
bon fama,si tin algun birtud,y si tin algo digno di alabansa, laga esakinan ocupa boso mente.
No ta pornada e palabra di Dios ta siña nos y recorda, nos, pasobra den Romanonan 12:2 e palabra di
Dios ta bisa: No sea conforme e mundo aki , ma sea transforma pa medio di e renobamento di boso
mente, pa boso por comproba kico ta e bon, y agradabel y perfecto boluntad di Dios.
Cu hopi tristesa nos por mira hende cu no kier reconoce Dios,ta permiti e enemigo horta nan
indentidad,trastorna nan bida , produci humildad y felicidad falso y asina mantene nan den mundo di
scuridad.
Tin cierto cosnan cu hende ta papia tur dia manera: Mester droga, mester bebe, mester ta riba paranda
cual hopi biaha no ta bay bon cu nan salud, ni trabao, tampoco famia, pero esey ta e pensamento cu ta
biba den nan mente.
Tur pensamento malo y desconfiansa ta trece stress, y depresion, ta causa di violencia, rabia y odio.
Salud mental ta depende hopi di pensamento di hende,pasobra locual ta goberna bo mente ta dirigi bo
bida.
Ta masha importante, y hende mester ta masha cauteloso, serca ken nan ta tuma conseho.
Especialmente den asunto nan di bruheria y miramento di carta, pasobra semper e prome conseho cu
ta sali na esun negativo, den cual bo ta scucha un hende ta haci bo daño, of bo pareha ta gañabo y riba
esey desconfiansa ta cuminsa, y division ta drenta famia.
Sabiduria di Dios ta siña nos pa pone cos den oracion, especialmente ora nos tur ta na altura cu e
enemigo ta contra famia y matrimonio, pa nos ta cuidadoso cu nos pensamentonan y evita
desconfiansa, pasobra asina nos mes ta herida otro sin tin mester y cada herida den famia ta un porta
habri pa e enemigo.
Laga nos no lubida locual e palabra di Dios ta siña nos:
Pasobra e armanan cu nos ta bataya cune, no ta carnal , ma poderoso den Dios, pa basha e fortinan
abao, y pa destrui speculacion y tur arogancia cu ta wordo lanta contra e conocemento di Dios,hibando
den cautiverio tur pensamento,pa hacinan obedecido na Cristo. ( 2 Corintionan 10:4-5).
Cada biaha ora un pensamento crusa den nos mente, laga nos wak bon si locual cu nos ta pensa ta den
boluntad di Dios, pasobra tur locual ta adulterio, inmoralidad , malisia y abominiacion ta presenta
como un pensamento, y ta depende si nos ta acepte, of ta rechase den nomber di Cristo Hesus.
Sinceramente, Pastor Marcel Balootje.