Desaroyo riba Refineria i CPR ta keda spoki

Despues ku koalishon di 13 di MFK i PNP a vota kontra Moshon

Resientemente den un reunion públiko di presupuesto 2023 Frakshon di MAN a entregá un moshon riba e situashon rondó di apertura di refineria. E moshon aki tabatin 3 desishon den kual ta fiha posishon pa gobièrnu tuma pasonan konkreto den henter e proseso pero tambe pa duna informashon riba e proseso. 

Desishon di Moshon di 13 desèmber 2022 kual a keda trata dia 20 desèmber 2022:

1. Pa Gobièrnu informá parlamento di forma regular riba e proseso negoshashon pa yega na un operador di nos refineria.

1. Pa urgi Gobièrnu pa manda e proyekto di lei di medio ambiente kaminda ta krea norma di polushon pa asina keda tratá den Parlamento. 
2. Pa urgi Gobièrnu pa den e promé kuartal di 2023 tin desaroyonan konkreto pa loke ta e negoshashon ku e kompania CPR, si no mester habri e proseso di nobo.

Manera e koalishon a bini ta hasi ku lokual gobièrnu bisa ta sosodé, a skohe pa vota kontra di e moshon aki. Koalishon MFK i PNP a indiká ku ta kontra pa informá pueblo i parlamento riba e desaroyo di refineria. Koalishon ta kontra pa gobièrnu hasi mas lihé ku ta posibel, pa asina entregá e lei di medio ambiente, i tambe koalishon MFK PNP ta di akuerdo pa no trese klaridat i tin pasonan konkreto ku e kompania CPR rondó di refineria. 

Den medionan di komunikashon ta sali informashonnan ku ta konfirmando falsifikashon di dokumentashon ku a keda entregá dor di e kompania CPR den e proseso di negoshashon pa yega na un operador di nos refineria. Pa nos, apertura di refineria ta keda importante pa desaroyo ekonómiko i asina krea  kuponan di trabou pa nos hendenan.

Pa medio di e karta aki suskritonan kier hasi petishon pa un Reunion Públiko di Parlamento ku karakter di urgensia. Pa e reunion Públiko nos a pidi presensia di Minister Presidente i Asuntunan General Sr. Gilmar Pisas.  

Nos a hasi un supliká na Presidente di Parlamento pa mas pronto posibel, konvoká e reunion pa di e forma aki Parlamento i pueblo di Kòrsou por haña informashon rondó di e proseso di refineria. Pueblo tin derechi di haña informashon.